დონალდ ტრამპი - მე თქვენ გაგაოცებთ
აშშ-ის პრეზიდენტის დონალდ ტრამპის განცხადებით, ის განიხილავს საიმიგრაციო პოლიტიკის გამკაცრების "სრულიად ახალი განკარგულების" ხელმოწერის შესაძლებლობას. აღნიშნულის შესახებ აშშ-ის პრეზიდენტმა ჟურნალისტებს განუცხადა.
"ჩვენ სხვადასხვა ვარიანტები გვაქვს, მათ შორის სრულიად ახალი განკარგულების ხელმოწერა. ჩვენ უნდა სწრაფად ვიმოქმედოთ უსაფრთხოების მიზნებისთვის", - განაცხადა დონალდ ტრამპმა.
"ჩვენ გვექნება უსაფრთხოების ახალი ზომები. ჩვენ გვექნება ძალიან სერიოზული შემოწმებები, მათ ექსტრემალურს ვუწოდებდი. ჩვენს ქვეყანაში მხოლოდ ის ხალხი შემოვა, ვისაც კარგი განზრახვები აქვს", - განმარტა მან.
ტრამპმა ამავდროულად აღნიშნა, რომ მას სურს, რომ ახალი დოკუმენტი "ოდნავ განსხვავდებოდეს" თავდაპირველი განკარგულებისგან და პირობა დადო, რომ მოქმედებას "ორშაბათს ან სამშაბათს" დაიწყებს.
"მე თქვენ გაგაოცებთ", - დასძინა აშშ-ის პრეზიდენტმა.
აღსანიშნავია, რომ სან-ფრანცისკოს მეცხრე ოლქის სააპელაციო სასამართლოს გადაწყვეტილებით, ქვემდგომი სასამართლოს გადაწყვეტილება დონალდ ტრამპის საიმიგრაციო განკარგულების დაბლოკვის თაობაზე ძალაში დარჩა.