საკვები, რომელიც ძაღლებისთვის შხამიანია | Allnews.Ge

შეიძლება თქვენს ძაღლებს ხშირად ანებივრებთ სხვადასხვა ნუგბარით, თუმცა მნიშვნელოვანია გვახსოვდეს, რომ გარკვეული საკვები, რომელიც ადამიანებისთვის უსაფრთხოა, ძაღლებისთვის შეიძლება საზიანო იყოს.

ძაღლებს განსხვავებული მეტაბოლიზმი აქვთ, ამიტომ ადამიანებისთვის განკუთვნილი საკვების მიცემა შეიძლება უკიდურესად საშიში და შხამიანიც კი იყოს.

რისკების თავიდან ასაცილებლად, გადახედეთ ჩამონათვალს და გაიგეთ, რომელი საკვებია ძაღლებისთვის შხამიანი.

• ავოკადო

ავოკადო საშიშია, ნაწილობრივ ფუნგიციდური ტოქსინის — პერსინის გამო. მხოლოდ მაღალი დოზებია ლეტალური, მაგრამ მცირე რაოდენობით მიღებამაც შეიძლება გამოიწვიოს მსუბუქი სიმპტომები, როგორიცაა ღებინება და დიარეა.

• ვაშლი

ვაშლის რბილობი ტოქსიკური არ არის, მაგრამ თესლები შეიძლება შხამიანი იყოს ამიგდალინის სახელწოდების ნაერთის გამო. თუმცა ტოქსიკური რომ გახდეს, საჭიროა დიდი რაოდენობით მიღება და თესლების დაღეჭვა.

• ნიორი

ნიორი შეიძლება ლეტალური იყოს ძაღლებისთვის თიოსულფატის ნაერთის გამო, რომელიც აზიანებს სისხლის წითელ უჯრედებს. მოწამვლისთვის დიდი რაოდენობის ნიორია საჭირო, თუმცა ზოგი ჯიში განსაკუთრებით მგრძნობიარეა.

• რძე და სხვა რძის პროდუქტები

მიუხედავად იმისა, რომ რძესა და რძის პროდუქტებს კალციუმის გამაძლიერებელი თვისებები აქვს, ისინი შეიძლება ცუდად მოქმედებდეს ძაღლებზე და შეუწყოს ხელი ლაქტოზის აუტანლობას. ეს შეიძლება ძაღლებში სერიოზულ დისკომფორტს იწვევდეს.

• მაკადამიის კაკალი

ზოგადად, კაკალი ძაღლებისთვის კარგი არ არის, განსაკუთრებით მაკადამიის კაკალი. ისინი ყველაზე ტოქსიკურებად მიიჩნევა და შეიძლება გამოიწვიოს ღებინება, სისუსტე, ჰიპერთერმია და სხეულის ფუნქციების დაკარგვა.

• მდოგვი

მცირე დოზებში მდოგვი ლეტალური არ იქნება, თუმცა უფრო დიდი რაოდენობით შეიძლება ტოქსიკური იყოს. სინამდვილეში, მდოგვის მსუბუქი ტოქსიკურობის გამო, ვეტერინარები ზოგჯერ მას ღებინების გამოსაწვევად იყენებენ საჭიროების შემთხვევაში.

• შოკოლადი

შოკოლადი შეიცავს სტიმულატორს სახელად თეობრომინი, რომელიც ძაღლებისთვის შხამიანია. თეობრომინის რაოდენობა შოკოლადის ტიპზეა დამოკიდებული. იგი ძირითადად მოქმედებს კუჭ-ნაწლავზე, გულზე, ცენტრალურ ნერვულ სისტემასა და თირკმელებზე.

• ხახვი

ხახვი შეიძლება შხამიანი იყოს ძაღლებისთვის მასში არსებული თიოსულფატის გამო. ზოგი ძაღლის ჯიში უფრო მოწყვლადია, ხოლო მათი ზომაც დიდ როლს თამაშობს.

• მოხარშული ძვლები

ძაღლისთვის უმი, მოუმზადებელი ძვლის მიცემა კარგია დასაღეჭად, მაგრამ მოერიდეთ მოხარშულ ძვლებს. ისინი ადვილად იმსხვრევა და დიდი რაოდენობით მიღების შემთხვევაში შეიძლება გამოიწვიოს ყაბზობა ან ნაწლავის გახვრეტა, რაც შეიძლება ლეტალური იყოს.

• ყურძენი და ქიშმიში

ყურძენი და ქიშმიში ძაღლებისთვის ერთ-ერთ ყველაზე სერიოზულ საფრთხედ მიიჩნევა. მცირე რაოდენობამაც კი შეიძლება გამოიწვიოს თირკმლის უეცარი უკმარისობა და ხშირად იწვევს ღებინებასა და დიარეას.

• კოფეინი

კოფეინის მცირე რაოდენობა ზიანს არ გამოიწვევს, მაგრამ თუ ძაღლი ყავის მარცვლების ან ჩაის პაკეტების მუჭას გადაყლაპავს, ეს შეიძლება სერიოზულ საფრთხედ იქცეს.

• საფუარი

თუ ძაღლი დაუმზადებელ ცომს შეჭამს, ეს შეიძლება უკიდურესად საშიში იყოს, რადგან დუღილის პროცესში არსებული საფუარი სწრაფად შეიწოვება სისხლში და წარმოქმნის საკმარის ეთანოლს ალკოჰოლური მოწამვლის გამოსაწვევად.