მილიონ-ნახევრიანი ბინა ესპანეთში, წილები კომპანიებში, მდიდრული წვეულებები... - რა ქონებას ფლობს მიქაუტაძის ოჯახი და რატომ მოექცა ყურადღების ცენტრში მისი ცოლის იუბილე
სახელმწიფო უსაფრთხოების სამსახურმა (სუს) ეკონომიკისა და მდგრადი განვითარების მინისტრის ყოფილი მოადგილე, რომეო მიქაუტაძე დააკავა. მას სამსახურებრივი უფლებამოსილების ბოროტად გამოყენებასა და მილიონობით ლარის უკანონო შემოსავლის ლეგალიზაციას ედავებიან.
სუს-ის განცხადებით, გამოძიებით დადგინდა, რომ 2017 წლის 3 ოქტომბრიდან 2024 წლის 9 თებერვლამდე, სხვადასხვა მაღალ თანამდებობაზე ყოფნისას, თანამდებობრივ გავლენასა და გამოცდილებას პირადი სარგებლის მიღების მიზნით, უკანონოდ იყენებდა ენერგეტიკულ სფეროში სხვადასხვა პირისთვის არამართლზომიერი უპირატესობის მინიჭებისთვის.ამ პირებისთვის უკანონო დახმარების გაწევის სანაცვლოდ, ის მათგან ენერგოკომპანიებსა და ჰესებში წილებს იღებდა, რომელთა რეალური მფლობელი თავად იყო, ოფიციალურად კი წილები ნდობით აღჭურვილ პირებზე ჰქონდა გაფორმებული. აღნიშნული უკანონო საქმიანობის შედეგად, რ.მ.-მ განსაკუთრებით დიდი ოდენობით შემოსავალი მიიღო.
მიქაუტაძის ქონება და მეუღლე
რომეო მიქაუტაძის დაკავებამდე რამდენიმე თვით ადრე, 2024 წლის აპრილში, მედიაში გავრცელდა ინფორმაცია მისი მეუღლის, ნინო მიქაუტაძის მადრიდში, ისტორიულ უბანში ბინის შეძენის შესახებ. ჟურნალისტური გამოძიების თანახმად, ნინო მიქაუტაძემ 103 კვ.მ. საცხოვრებელი ბინა 2024 წლის 18 იანვარს შეიძინა, როდესაც მიქაუტაძე ჯერ კიდევ თანამდებობაზე იყო.
მიუხედავად იმისა, რომ ხელშეკრულებაში ბინის ფასი მითითებული არ არის, ბროკერების საიტებზე მსგავსი ფართის ბინა მადრიდის ცენტრში დაახლოებით 829 000 ევრო ღირს. ნინო მიქაუტაძემ არ უარყო შენაძენი, თუმცა, კითხვაზე, თუ რა შემოსავლით ასაბუთებდა ესპანეთის დედაქალაქში ბინის ყიდვას, განაცხადა, რომ დეკლარაციის შევსების შემდეგ ყველაფერი გაცხადდებოდა. მოგვიანებით დეკლარაციაში გამოჩნდა, რომ ბინაში წყვილმა 660 ათასი ევრო გადაიხადა.
აღსანიშნავია, რომ რომეო მიქაუტაძემ ეკონომიკის მინისტრის მოადგილის თანამდებობა თებერვალში დატოვა. "მთავარი არხის" ინფორმაციით, მანამდე მას სუს-ის ანტიკორუფციულ დეპარტამენტში რამდენჯერმე დაკითხეს და კითხვები დაუსაბუთებელ ქონებასა და სავარაუდო კორუფციულ გარიგებებზე ჰქონდათ.
მიქაუტაძის განმარტება ქონებაზე
მედიაში გავრცელებული ბრალდებების საპასუხოდ, მაშინ რომეო მიქაუტაძემ განაცხადა, რომ მისი და მისი ოჯახის წინააღმდეგ "კამპანიური ხასიათის აბსურდული ბრალდებები და ცილისწამება" მიმდინარეობდა. მან ხაზგასმით აღნიშნა, რომ წლების განმავლობაში მის ოჯახს მსხვილი ბიზნესიდან ჰქონდა მაღალი შემოსავალი, ხოლო მოგვიანებით ეს ბიზნესი გაყიდეს, საიდანაც დაახლოებით 2 მლნ ლარის ფულადი ქონება მიიღეს. ასევე, მიქაუტაძე აცხადებდა, რომ არა-საჯარო სექტორში საქმიანობიდან დამატებითი შემოსავალი და დანაზოგის გაკეთების შესაძლებლობა ჰქონდა.
მან თავისი ქონების წარმომავლობა დეტალურად განმარტა და აღნიშნა, რომ მისმა ოჯახმა 5 ბინა თბილისში და 2 ბინა ბათუმში, ასევე აგარაკი წეროვანში გაყიდა. ამის სანაცვლოდ, მათ შეიძინეს 1 ბინა თბილისში (180 კვ.მ.), 2316 კვ.მ. მიწის ნაკვეთი წყნეთში, 830 კვ.მ. დედოფლისწყაროში და 410 კვ.მ. ოზურგეთში.
რაც შეეხება კომპანიებს, მიქაუტაძის თქმით, მისი მეუღლე 50-პროცენტიან წილს ფლობს კომპანია „ვიუ ფოინთში“ და საბანკო კრედიტით შეიძინა მიწა წავკისში (2.2 მლნ აშშ დოლარი). ასევე, იგი 50-პროცენტიან წილს ფლობს თბილისში მდებარე სასტუმრო „ბეთლემში“, რომელიც საბანკო კრედიტით (915 000 ევრო) არის შეძენილი. იხილეთ სრულად