როდემდე გაგრძელდება ქარი და გრილი ამინდები - გრძელვადიანი პროგნოზი
გასული დღეების განმავლობაში საქართველოს უმეტეს რაიონში იყო წვიმა, ზოგან ძლიერი და ელჭექი, აღმოსავლეთ საქართველოს ცალკეულ რაიონებში სეტყვა. დასავლეთის მიმართულების ძლიერი ქარი. თუ რამ გამოიწვია დაბალი ტემპერატურა, ქარი და როდემდე გაგრძელდება გრილი ამინდები, ასევე ქარიც, გარემოს ეროვნული სააგენტოს ჰიდრომეტეოროლოგიის დეპარტამენტის გრძელვადიანი პროგნოზების განყოფილების უფროსი - ხათუნა ქოქოსაძე გვესაუბრება.
- ჩრდილო-დასავლეთიდან გავრცელებული (სკანდინავიის ციკლონთან დაკავშირებული) ცივი ჰაერის მასები საქართველოში შავი ზღვის მხრიდან შემოდის და ვრცელდება აღმოსავლეთისკენ რაც იწვევს ნალექს, ქარს და ტემპერატურის მკვეთრ კლებას.
- როდემდე გაგრძელდება გრილი ამინდები?
- არამდგრადი ამინდი 24 ივნისამდე გაგრძელდება. 25 ივნისიდან როგორც დასავლეთ, ასე აღმოსავლეთ საქართველოში გამოიდარებს. ქარებიც შესუსტდება და ტემპერატურაც მოიმატებს.
- მათ შორის თბილისშიც დაბალი ტემპერატურა იქნება?
- 20 ივნისიდან 22 ივნისის ჩათვლით ტემპერატურა ცოტა მოიმატებს, 29-30 გრადუსამდე. 23 ივნისიდან კვლავ ტემპერატურის კლებაა მოსალოდნელი, დაახლოებით 25-26 ფარგლებში იმერყევებს, ხოლო 25 ივნისიდან ისევ მატებას დაიწყებს. 25 ივნისიდან 28 ივნისამდე დაახლოებით 30-31 გრადუსი იქნება.
საერთოდ ივნისი ზაფხულის სეზონისთვის ყველაზე გრილი თვეა. არაფერი უჩვეულო არ ხდება. ჩვეულებრივ, კლიმატურადაც 21-22 გრადუსია ივნისისთვის საშუალო ტემპერატურა. მაშინ როცა ივლისის და აგვისტოს თვის საშუალო ტემპერატურა 24-25 გრადუსია.
გარკვეულწილად კლიმატის ცვლილებებს აქვს გავლენა საქართველოზეც, მაგალითად წინა 30 წელს თუ შევადარებთ გაზაფხულზე აგრილების ტენდენცია უფრო შეინიშნება, ხოლო ზაფხული, პირიქით უფრო ცხელია წინა 30 წელთან შედარებით. ივლის-აგვისტოში მაქსიმალური ტემპერატურის 39-40 გრადუსამდე მატება ბოლო წლებში უფრო გახშირებულია.
ადრე თუ იყო ცხელი პერიოდი ივლისის შუა რიცხვებიდან აგვისტოს შუა რიცხვებამდე, ამ ცხელმა პერიოდმა უფრო აგვისტოს თვეში გადაინაცვლა. აგვისტოს შუა რიცხვებიდან აგრილება იწყებოდა, ამ ბოლო წლებში ძალიან ხშირია შემთხვევები, როდესაც ზუსტად აგვისტოს ბოლოსკენ უფრო ფიქსირდება ძალიან მაღალი ტემპერატურა. ამ მხრივ ცვლილება ნამდვილად არის, მაგრამ ეს სიგრილე ივნისისთვის არ არის უჩვეულო.