"წონის კლება ნელა მიდიოდა და ვნერვიულობდი, თუმცა ეს კარგი ყოფილა... " - როგორ შეიცვალა ბარბარა სამხარაძის ცხოვრება ოპერაციის შემდეგ
"14 წლის ასაკში ავიღე პასუხისმგებლობა და უკვე 10 წელია ამ პასუხისმგებლობით მოვდივარ. მე იგივე ვარ" - გვეუბნება მომღერალი ბარბარა სამხარაძე. მის ცხოვრებაში 2023 წელს მნიშვნელოვანი რამ მოხდა - ბარიარტრიული ოპერაცია გაიკეთა.
წონაში საგრძნობლად დაიკლო და ამბობს, რომ საკუთარი თავი ახლიდან გაიცნო. როგორ გრძნობს ოპერაციის შემდეგ თავს, როგორ მივიდა ამ გადაწყვეტილებამდე, რა შეცვალა ამ ყველაფერმა და რას ურჩევს სხვებს, ამაზე AMBEBI.GE-ს მკითხველს ამ ინტერვიუთი თავად ეტყვის.
ბარბარა სამხარაძე:
- ძალიან კარგად ვარ, მაქვს მუსიკალური სტუდია, სადაც ბავშვებს ვამეცადინებ და შეიძლება ითქვას, რომ პატარ-პატარა ნაბიჯებით ჩემი ცხოვრების ოქროს ხანისკენ მივიწევ. მუდმივად უკეთესის მოლოდინში ვარ. ვცდილობ, რომ იმ საქმეში, რასაც ვაკეთებ, უფრო მეტი და კარგი შევქმნა. ვაშენებ ჩემს მომავალს და წინ მივიწევ.
- ამისთვის ადამიანს მოტივაცია სჭირდება. ეს ყველაფერი როგორ შეძელი?
- არ ვიცი, ასე როდის გავიზარდე, მაგრამ როდესაც ვიგებ და ვხედავ, ჩემთვის სრულიად უცხო ადამიანს რომ რაღაც სტკივა, აწუხებს, რაიმე ტრაგედია დაატყდა თავს, ამას შინაგანად განვიცდი. მერე როდესაც ვიაზრებ, რომ ეს პრობლემა მე არ მაქვს და ამ დროს ისეთ უბრალო და უმნიშვნელო რაღაცებზე მიწუწუნია, ვხდები, რომ ჩემი წუწუნი დაუშვებელია. მერე ასეთი დამოკიდებულება მაძლევს მოტივაციას. მატერიალური პრობლემები საწუწუნოა, მაგრამ მერე ხვდები, რომ ჯანმრთელობაზე მნიშვნელოვანი არაფერია. ახალი დღე რომ თენდება, ვცდილობ, იმ დღის მაქსიმუმი გავაკეთო, რომ უკან მოხედვა თამამად შევძლო. ყოველი დღე ნეგატივის გარეშე გავიარო, რადგან მე არ მაქვს ისეთი მძიმე პრობლემა, როგორიც შეიძლება სხვას ჰქონდეს.
- იმ წარმატების შემდეგ, რასაც 14 წლის ასაკში მიაღწიე, შენს ცხოვრებაში პრობლემა არაფერი ყოფილა?
- მანამდეც და მას მერეც გარშემო ადამიანებისგან მესმოდა, - "შენ ხარ დიდი", "შენ ხარ მსუქანი ადამიანი", "მსუქანი ბავშვი", - ჩემი მძიმე წონა საზოგადოებისთვის თითქოს პრობლემად იყო ქცეული. არადა, თავად მე იმ სტანდარტს ვამკვიდრებდი, რომ „მიმიღე ისეთად როგორიც ვარ“ და არავის საქმე არ არის, როგორი ვიქნები - მსუქანი, თუ გამხარი. ჩემი წონა კომპლექსს დიდად არ მიქმნიდა. და თუ კომპლექსი რაღაც დოზით მაინც არსებობდა, თავს არ ვაძლევდი იმის უფლებას, ის სხვას დაენახა, გამომემჟღავნებინა. მე რომ კომპლექსები მქონოდა, სცენაზე არ დავდგებოდი. არ მინდოდა, კომპლექსებს ვემართე. თუმცა ძალიან ადრე ჩემი თავი იმაში დავიჭირე, რომ გახდომა მინდოდა. დაბადების დღეზე, ტორტზე სანთელს რომ ვაქრობდი, წონის დაკლებას ჩავიფიქრებდი ხოლმე... მგონია, რომ ამ დროს ჩაფიქრებულ სურვილს ყველაზე დიდი ძალა აქვს და ამაში ალბათ ყველა გოგო დამეთანხმება...
ახლა და ახლა რომ ვუფიქრდები, იქიდან მოდიოდა ეს ყველაფერი. თან გარშემო მარწმუნებდნენ და მაჯერებდნენ იმას, რომ დიდი წონა მქონდა. ამიტომ, გახდომა და წონის დაკლება იმის გამო მინდოდა, რომ ხალხს აღარ ეთქვა ამ კუთხით ჩემთვის რაიმე.
- ბულინგი თუ ყოფილა?
- ძირითადად კიბერბულინგი. ვინც სოციალურ ქსელში ამ რაღაცებს წერს, ყოველთვის დაწერს, მათთან ჭიდილს აზრი არ აქვს... საზოგადოებას კი მივაღებინე ჩემი თავი ისეთად, როგორიც ვიყავი, მაგრამ ჩემი მისამართით აქა იქ მაინც გაისმოდა შეფარვითი გარკვეული ფრაზები წონის კუთხით. ბოლოს ეგ ფრაზებიც აღარ იყო10 წლის წინ თბილისში სოფლიდან რომ ჩამოვედი, დედაჩემიც შეფარვით მეუბნებოდა, - ჭამას მოუკელი, თბილისში შენნაირი მსუქანი ბავშვი არავინაა. მერე ვაკვირდებოდი და დიდ ბავშვს რომ დავინახავდი, ან ჩემზე დიდებს, გულზე მომეშვებოდა. ყველაზე გულსატკენი კი ის იყო, ქალი-გოგოები რომ არიან, გოგოობა რომ უნდათ, სურვილს გამოთქვამდნენ, რომ ჩემ გვერდით სურათში გადაეღოთ და არა ბარბარასთან, უბრალოდ უნდოდათ, ჩემ ფონზე გამხდრები გამოჩენილიყვნენ. განა ვერ ვხდებოდი, მაგრამ ვუყურებდი. მნიშვნელობა არ ჰქონდა, ფოტოზე ვინ სად დადგებოდა, მაგრამ ვიღაცას რომ ეს გამიზნულად ჰქონდა და ამას რის გამო აკეთებდა, კარგად ვხვდებოდი. მაგაში ყველას კარგად ვიჭერდი.
- ბარიატრიულ ოპერაციამდე როგორ მიხვედი?
- ნებისმიერი გადაწყვეტილების მიღებაა რთული, თორემ აქამდე რომ მიხვალ, მერე იმ გადაწყვეტილების რეალობაში მოყვანა, უკვე თავისით ხდება, რადგან გულით გინდა. 2023 წლის აგვისტოში მე და ჩემი და სოფელში ვიყავით. ჩემს დას ვუთხარი, თბილისში რომ ჩავალთ, ექიმთან უნდა მივიდე, წონის დაკლებაზე სერიოზული ფიქრი უნდა დავიწყო-მეთქი. უცებ მომინდა, საკუთარი თავის შეცვლა. იმ წონამდე მისვლა, რომელზეც შეგნებული ცხოვრების მანძილზე არ ვყოფილვარ, ან იმ პერიოდში ვყოფილვარ, რა პერიოდიდანაც ნაკლებად მახსოვს. ბელგიიდან ახალი ჩამოსული ვიყავი, დანაზოგი მქონდა და ანაბარი გავხსენი, რომ გარკვეული თანხა დამეგროვებინა. თუ ოპერაცია დამჭირდებოდა, ფინანსურად მზად ვყოფილიყავი. მოგეხსენებათ, ეს ოპერაცია იაფი არ ღირს.
- მოკლედ, გონებაში მოამწიფე აზრი, რომ ბარიატრიული ოპერაცია გაგეკეთებინა...
- და ანაბრის გახსნიდან 2 კვირაში "ნანუკას შოუს" მთავარმა პროდიუსერმა დამირეკა. მითხრა, რომ დავით ანდღულაძის კლინიკას შენთან ერთად კოლაბორაცია უნდა. ოპერაციაზე თანახმა თუ ხარო? ყველაფერი დაგიფინანსდება და შენ მხოლოდ გადაცემის გმირი იქნებიო. იხილეთ სრულად