"ითოვებს ხვალაც... კიდევ უფრო აცივდება და ღამით ყინვა გაძლიერდება. ველოდებით ქარის გაძლიერებასაც" - როდემდე გაგრძელდება ქვეყანაში უამინდობა?
20 თებერვლის დილას, თბილისის რიგ უბნებში მცხოვრებ დედაქალაქელებს თოვლი დახვდათ. განსაკუთრებულად თოვდა გარეუბნებში. წუხელ ქვეყნის თითქმის ყველა რეგიონში თოვლი და ყინვა იყო. თოვლი მოვიდა როგორ თბილისის შემოგარენში, ასევე რეგიონების ნაწილში.
გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსი სვეტლანა ნიორაძე მოსალოდნელ ამინდებზე დეტალურად გვესაუბრა...
- დღეს ვფიქრობთ, რომ დედაქალაქში თოვა ისევ გაგრძელდება, ასევე ითოვებს ხვალაც. შემდეგ უკვე უნდა შემცირდეს თოვის ინტენსივობა, მაგრამ კიდევ უფრო აცივდება და ღამით ყინვა გაძლიერდება. 23-24-25 თებერვალს ველოდებით ქარის გაძლიერებას. ამ მოკლე პერიოდში ასეთი არამდგრადი ამინდი ნარჩუნდება, 26 თებერვლამდე. ჯერ არ ჩანს, არც დათბობა არც ამინდის გაუმჯობესება.
- შესაძლებელია თბილისში თოვლი დადოს?
- დიახ, მაგრამ თბილისის თოვლი ცოტა რთული თემაა. ახლა რეგიონებშიც ყველგან თოვს, კახეთშიც, დასავლეთშიც, პროგნოზი ისეთი გვაქვს, რომ შესაძლოა თოვლი თბილისშიც დადოს. ამ დროისთვის სხვადასხვა რეგიონში შეზღუდულია მოძრაობა. კობი-გუდაურის მონაკვეთზე დიდი თოვლი მოვიდა, ასევე სამხრეთ საქართველოში, ახალციხე, ახალქალაქი, შეზღუდულია ტრანსპორტით გადაადგილება. იქაც უფრო ძლიერად მოთოვს.
ზოგადად რთული ზამთარი არ ყოფილა, პირიქით, კახეთში რომ კარგი თოვლი მოვიდა, სჭირდებოდათ და ძალიან გაუხარდათ. ჩვენ ისეთ კლიმატურ ზონაში ვართ თოვლი აუცილებელია. თებერვალია, ჯერ კიდევ ზამთარი და არ არის გასაკვირი.