"თეატრში უნდა დადიოდე და არა შოპინგზე" - როგორ ეხმაურება ნანკა კალატოზიშვილი სალომე გოგიაშვილის კომენტარს, რომ გაფიცული მსახიობებიდან ვერავის ცნობს
უკვე კვირაზე მეტია საქართველო მსოფლიო მედიის ობიექტივშია. თბილისი და რეგიონები საპროტესტო აქციებმა მოიცვა. მოქალაქეები შვიდი დღეა აპროტესტებენ 28 ნოემბერს მთავრობის მიერ მიღებულ გადაწყვეტილებას, რომ ევროკავშირთან მოლაპარაკების გახსნის საკითხი 2028 წლის ბოლომდე დღის წესრიგში არ დააყენოს.
თითქმის ყოველ ღამე აქციების დაშლისას სპეცრაზმი იყენებს წყლის ჭავლს, ცრემლსადენ გაზს და სხვადასხვა საშუალებებს. შედეგად ჟურნალისტები და მოქალაქეები დაშავდნენ. მთავრობის გადაწყვეტილებას საჯარო უწყებებში თანამშრომლების პროტესტი მოჰყვა. ასევე გუშინ გაიფიცნენ კულტურის სფეროს წარმომადგენლები. უკვე რამდენიმე დღეა ცნობილი სახეები, სპორტისა და კულტურის სფეროს წარმომადგენლები, "ინფლუენსერები" სოციალურ ქსელში მხოლოდ ერთ თემას ეხებიან - პროტესტი თბილისში, ვითარება აქციაზე.
გუშინ მსახიობები და რეჟისორები რუსთაველის თეატრთან შოთა რუსთაველის თეატრისა და კინოს სახელმწიფო უნივერსიტეტთან შეიკრიბნენ და რექტორისგან მიმდინარე მოვლენებზე პოზიციის დაფიქსირება მოითხოვეს.
გაფიცული მსახიობების თემას სალომე გოგიაშვილი სოციალურ ქსელში ასე გამოეხმაურა: "მართლა ვერავის ვცნობ და ვინ არიან, საიდან იფიცებიან".
მის კომენტარს მსახიობმა ნანკა კალატოზიშვილმა უპასუხა: "თეატრში უნდა დადიოდე და არა შოპინგზე, მაშინ იცნობ!".
უნდა აღინიშნოს ისიც, რომ ბოლო პერიოდში საზოგადოების დიდი ნაწილი პოზიციის დაფიქსირების მოთხოვნით იმ მსახიობებსაც მიმართავს, ვინც ამ დრომდე დუმან.მათ შორის არიან, დუტა სხირტლაძე, ნანუკა გულუა, სალომე შარვაძე, თამუნა ნიკოლაშვილი, თათული ედიშერაშვილი და სხვები.