"ჩემი აზრით, გამორიცხულია ეროვნულ ნაკრებში ვინმე პოლიტიკის გამო იჩაგრებოდეს" - ბუდუს პასუხი კითხვაზე, რატომ აქვს ნაკრებში ცოტა სათამაშო დრო და თუ უსაუბრია ვილი სანიოლთან?
საქართველოს ნაკრები რატომ აქვს ბუდუ ზივზივაძეს ნაკრებში ცოტა სათამაშო დრო და თუ უსაუბრია ვილი სანიოლთან ამ თემაზე? - ეს კითხვა "ჯეო თიმმა“ საქართველოს ნაკრებისა და გერმანული "კარლსრუეს“ ფეხბურთელს დაუსვა:
- როდესაც საქართველოს ნაკრებთან ერთად, ევროპის ჩემპიონატზე ისტორიაში პირველად ხარ და შენი ქვეყნისთვის ხარ იქ, ეს ფაქტორები, რა თქმა უნდა, ბედნიერებას განიჭებს. არ არსებობს ფეხბურთელი, რომელსაც თამაში არ უნდა, მეც არ ვარ გამონაკლისი, იქ მყოფ ოცდაექვსივე კაცს თამაში უნდოდა. ნამდვილად, არ დამიწყია არცერთი თამაში, მაგრამ როგორც ადრე ვთქვი, იმ რამდენიმე წუთითაც ბედნიერი ვარ, იმიტომ რომ გინდა არ გინდა ჩემს კარიერულ ისტორიაში წერია, რომ მე ევროპის ჩემპიონატზე ვითამაშე. ხანდახან მსგავს სიტუაციებს სხვისი თვალით ვუყურებ ხოლმე, მაგალითად, იქ იყვნენ ფეხბურთელები, რომლებსაც საერთოდ არ უთამაშიათ, მე კი მქონდა ბედნიერება, რომ მინიმუმ ერთი წუთი მაინც გამეტარებინა ევროპის ჩემპიონატის მოედანზე საქართველოს სახელით და სწორედ ამიტომ მქონდა განწყობა შენარჩუნებული. ცუდ სიტუაციებშიც ვინარჩუნებ პოზიტივს.
- მწვრთნელ ვილი სანიოლთან ხომ არ გილაპარაკია? რამით ხომ არ არის უკმაყოფილო ან რამე განსხვავებულს ხომ არ ითხოვს?
- არა, არ მქონია საუბარი. ადრე აღვნიშნე კიდევაც ერთ-ერთ ინტერვიუში, რომ მქონია სხვა მწვრთნელთან რამდენიმეჯერ საუბარი და დადებითადაც უმოქმედია ჩემზე ამ საუბარს, მაგრამ ამჯერად ნაკრებში არ ჩამითვლია საჭიროდ რომ მესაუბრა, რადგან თუ მწვრთნელმა ასე გადაწყვიტა, მისი გადმოსახედიდან ასე იყო სწორი, შედეგიც იყო ამიტომ ვერაფერს მოითხოვ ან შეცვლი... მეორე თემაა ვიმსახურებდი თუ არ ვიმსახურებდი, რაც იყო, იყო წარსულს ჩაბარდა, იმ დროს ვეღარ დავაბრუნებ, ამიტომ ეს სეზონი დავიწყე ასეთი შემართებით.
არ ვცხოვრობ წარსულით, პირიქით, სულ წინ ვიხედები, როგორც ყველა ფეხბურთელს მსურს მეტი გავაკეთო, სწორედ ამიტომ ვფიქრობ, რომ ახლა ვარ ძალიან კარგ კონდიციასა და ფორმაში. ყველაფერს ვიზამ, რომ ასე გაგრძელდეს და მომავალში იმედი მაქვს რომ მეტი დრო მომეცემა.