"ივანიშვილმა ღმერთსაც კი "გადაუჯოკრა“, მესამედ მოვიდა, ეს კარგი ცხოვრებით არ არის განპირობებული, ორი კინკილა სპორტსმენის იმედზე დარჩნენ" - გია ხუხაშვილი
"[ბიძინა ივანიშვილმა] ღმერთსაც კი "გადაუჯოკრა“, მესამედ მოვიდა, ეს იძულებითი ნაბიჯია, ეს ყველაფერი კარგი ცხოვრებით არ არის განპირობებული, - ასე შეაფასა პოლიტიკის ანალიტიკოსმა, გია ხუხაშვილმა "ინტერპრესნიუსთან“ საუბრისას, "ქართული ოცნების“ სიის ოცეული.
როგორც მან აღნიშნა, სია "კატასტროფულად სუსტია" და მმართველი გუნდი "ორი კინკილა სპორტსმენის იმედზეა“."ბიძინა ივანიშვილის პირველ ნომრად დასახელებას აქვს რაციონალური და ირაციონალური ახსნა. რაციონალური ახსნა ისაა, რომ მას არ აქვს რეალურად არჩევნებში გამარჯვების იმედი. შესაბამისად, მას შეიძლება მოუწიოს ვინმესთან კოალიციის შექმნა და აქედან გამომდინარე, ამ მოლაპარაკებებში მისთვის მნიშვნელოვანია მოქმედებების სრული დიაპაზონი ჰქონდეს. მას შეიძლება მოუწიოს ორი ირაკლის ჩარეცხვა და ეს იყოს ერთ-ერთი პირობა პოსტსაარჩევნოდ კოალიციის შექმნის. პოტენციურ პარტნიორთან ურთიერთობაში მას ხელ-ფეხი გახსნილი უნდა ჰქონდეს. მას უნდა ჰქონდეს გადაწყვეტილების მიღების კომფორტი. პირველ ნომრად სხვა თუ დასახელდებოდა, ბუნებრივია,
მანევრს მოუკლავდა, იმიტომ რომ ოპოზიციაში არ არსებობს ძალა, რომელიც მოლაპარაკებებს ან კობახიძესთან ან ღარიბაშვილთან გამართავდა. ეს არის რაციონალური ახსნა. გარდა ამისა, მას ესმის, რომ სჭირდება პოლიტიკური იმუნიტეტი და გარკვეულწილად საკუთარი როლის სრულ ლეგალიზაციას ახდენს, იმიტომ, რომ საკუთარ მომავალთან დაკავშირებით გარკვეული შფოთვები აქვს. ეს ირაციონალური ახსნაა, რომელიც ასევე სევდიანი ისტორიაცაა, მესამედ მოსვლის ისტორია. პრინციპში, შეიძლება ითქვას, რომ ღმერთსაც კი "გადაუჯოკრა", მესამედ მოვიდა. ეს იძულებითი ნაბიჯია, ეს არ არის მისთვის კომფორტული ქმედება. მე ვფიქრობ, რომ მას პრეტენზია იმუნიტეტის შესაძენად, სამომავლოდ უფრო პრეზიდენტობაზე ექნება. პრეზიდენტის სტატუსი და მისი კონსტიტუციური ფორმატი მისთვის კომფორტულია - გაძლევს იმუნიტეტს და სულაც არ არის ვალდებული კაბინეტში იჯდეს და 24 საათი იმუშაოს. მე ვფიქრობ, რომ ეს ყველაფერი კარგი ცხოვრებით არ არის განპირობებული.
რაც შეეხება სიას, სია კატასტროფულად სუსტია. გასაგებია, რომ მას სჭირდება ღილაკზე თითის დამჭერები. პოლიტიკური ნება არავის რომ არ გააჩნია, მარტივად იკითხება. პრობლემა ისაა, რომ ცნობად სახეებს მაინც არჩევდნენ სხვადასხვა სფეროდან, როგორც ჩანს, ძალიან დაკნინდა ამ მხრივ, არავინ დაეთანხმა და ორი კინკილა სპორტსმენის იმედზე დარჩნენ. შესაბამისად, სია ძალიან სუსტია. გარდა ამისა, რატომ 20-კაციანი სია, მათ ხომ საკონსტიტუციო უმრავლესობაზე აქვთ პრეტენზია?! რატომ არაა 50-კაციანი? ეს მეტყველებს, რომ მაინცდამაინც დიდი იმედი იმის, რომ გრძელი სიით შევლენ პარლამენტში თვითონაც არ აქვთ“, - განაცხადა გია ხუხაშვილმა.
ცნობისთვის, "ქართულმა ოცნებამ" საპარლამენტო სიის პირველი ოცეული დაასახელა. სიის პირველი ნომერი პარტიის საპატიო თავმჯდომარე ბიძინა ივანიშვილი იქნება. ამასთან, სიაში არიან მოქმედი ოლიმპიური სპორტსმენები, ლაშა ტალახაძე და გენო პეტრიაშვილი.