“8-წლიანი ძიება დასრულებულია, ჩემი ბიოლოგიური მშობელი ვიპოვე“ - თამუნა მუსერიძე გულშემატკივრებს საინტერესო დეტალებს უზიარებს
მრავალწლიანი ძიების შემდეგ, ჟურნალისტმა თამუნა მუსერიძემ მისი ბიოლოგიური მშობელი იპოვა.
ამის შესახებ ტელეწამყვანმა ვიდეო გაავრცელა, სადაც დეტალებზე საუბრობს:
“ბევრმა გაიგო უკვე და ამიტომაც, სანამ სხვებისგან გაიგებთ, მირჩევნია მე ვთქვა.
8-წლიანი ძიება დასრულებულია. მე ჩემი ბიოლოგიური მშობელი ვიპოვე.
ამ ეტაპზე სამწუხაროდ ვერ ვამბობ სხვა დეტალებს, თუმცა იმედი მაქვს, როდესაც მას პირადად ვნახავ, მომეცემა საშუალება, რომ სხვა დანარჩენ ინფორმაციებზეც მოგაწოდოთ სიახლე. ძალიან დიდი მადლობა მინდა ვუთხრა ყველა იმ ადამიანს, ვინც ამ 8 წლის განმავლობაში იყო ჩემთან ერთად - განსაკუთრებით ჩემს ქმარს. თითოეულ თქვენგანს, ვინც მე მგულშემატკივრობდით,“ - აღნიშნავს მუსერიძე მიმართვაში.
ჟურნალისტმა 31 წლის ასაკში გაიგო, იმის შესახებ, რომ ის “აყვანილი“ იყო. მას შემდეგ ბიოლოგური მშობლების ძიება არ შეუწყვეტია.
თამუნა მუსერიძე ბი-ბი-სის 2023 წლის ასი ყველაზე გავლენიანი ქალის სიაში მოხვდა. აღსანიშნავია, რომ ის პირველი ქართველი ქალია, რომელიც ამ სიაში აღმოჩნდა.
მან 2017 წელს დააფუძნა "ფეისბუკ"-ჯგუფი "ვეძებ" და ათეულობით ადამიანს აპოვნინა დედა, მამა, დედმამიშვილები, ნათესავები... თავისი ბიოლოგიური მშობლების ძიების პროცესში მან აღმოაჩინა, რომ საქართველოში მე-20 საუკუნიდან არსებობდა ჩვილებით ვაჭრობის მავნე პრაქტიკა, რის გამოც, ბევრი ბავშვი გარდაცვლილად გამოაცხადეს და უკანონოდ გააშვილეს.
რამდენიმე თვის წინ კი პრეზიდენტმა ღირსების მედლით დააჯილდოვა.