"რიკოთი მიწისძვრის კუთხით ბომბია... იქ არსებულ ესტაკადებს აქვთ სერიოზული პრობლემა, რამდენიმე კვლევა ვნახე და..." - თეა გოდოლაძე
გუშინ წვიმის გამო მოქალაქეებს რიკოთზე კილომეტრიან საცობში საათობით მოუწიათ დგომა.
საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, რიკოთის უღელტეხილზე მოძრაობა დროებით იყო შეზღუდული, რადგან სავალ ნაწილზე წყალი და ლაფი ჩამოვიდა.
"კერძოდ, სოფელი ხევის მიმდებარედ, მშენებარე მონაკვეთთან, ძლიერი წვიმის შედეგად, ფერდობიდან წყლისა და ლაფის მასა გადმოვიდა გზის სავალ ნაწილზე, რის გამოც, გაწმენდითი სამუშაოების მიმდინარეობის პერიოდში, დროებით შეიზღუდა ავტოტრანსპორტის მოძრაობა.
გაწმენდითი სამუშაოები დასრულებისთანავე ავტოტრანსპორტის მოძრაობა აღდგა.
ამ ეტაპზე, რიკოთის საუღელტეხილო მონაკვეთზე მოძრაობა ორმხრივ რეჟიმში მიმდინარეობს. ასევე, სოციალურ ქსელში გავრცელებული ინფორმაცია რიკოთის უღელტეხილზე მეწყრის ჩამოსვლის შესახებ არ შეესაბამება სინამდვილეს“, - აღნიშნულია ინფორმაციაში.
მოქალაქეების განსაკუთრებული აღშფოთება იმ კადრებმა გამოიწვია, სადაც ახალ აშენებული ესტაკადა ჩანს. კადრებში ვხედავთ, როგორ გადმოდის ესტაკადიდან ქვიშა და წყალი.
სეისმოლოგი თეა გოდოლაძე წერს, რომ ესტაკადას აქვს სერიოზული პრობლემა. ასევე ამბობს, რომ ესტაკადა გადახრილია, მისი ბოძები წვრილია და საკითხავია ის მიწისძვრას გაუძლებს თუ არა.
"ბევრჯერ დავწერე, კიდევ დავწერ, რიკოთის ესტაკადებს აქვთ ძალიან დიდი და სერიოზული პრობლემა. რამდენიმე კვლევა ვნახე(სამწუხაროდ ის დოკუმენტაცია არ მაქვს), სადაც ეწერა, რომ ადგილზე გეოლოგიური სამუშაოები ვერ ჩატარდა მიუვალობის გამო.
კაცმა არ იცის, მყარ გრუნტზეა დაფუძნებული ბოძები თუ არა. ერთი თავად აიღეს, გადაიხარა და იმიტომ. სეისმური კვლევა არ დევს. რიკოთი მიწისძვრის კუთხით ბომბია და ესტაკადების ბოძები ძალიან წვრილი, ძლიერ მიწისძვრას რომ გაუძლოს! ახლა დაეწყვეთ ინფრასტრუქტურის და საგზაოს თანამშრომლები და მლანძღეთ. ჩიტებს ამბავი მოაქვთ გეთაყვა!" - წერს თეა გოდოლაძე.