ახალგაზრდა ქალი, რომელიც ელექტრონული მუსიკის ფესტივალზე შეუძლოდ გახდა, მცხეთის კლინიკაში გარდაიცვალა - რა მოხდა ფესტივალზე?
27 მაისს, საგურამოში, 4GB - ელექტრონული მუსიკის ფესტივალზე 31 წლის ქალი მოულოდნელად შეუძლოდ გახდა, ის სასწრაფო დახმარების ეკიპაჟმა მცხეთის "ჯეო ჰოსპიტალსში" გადაიყვანა. სამწუხაროდ, ახალგაზრდა ქალის გადარჩენა ვერ მოხერხდა. როგორც ფესტივალის დამსწრეები ჰყვებიან, ის ქუთაისიდან იყო ჩამოსული. მათივე თქმით, მან, სავარაუდოდ, დაბინძურებული სინთეტიკური ნარკოტიკული საშუალება მიიღო, რამაც სიკვდილი გამოიწვია.
ჩვენ დავუკავშირდით მცხეთის "ჯეო ჰოსპიტალსს", სადაც გვითხრეს:
"პაციენტი კლინიკაში შეყვანისას იყო კრიტიკულ მდგომარეობაში, საჭიროებდა რეანიმაციულ და აპარატულ მხარდაჭერას, რაც სრული მასშტაბით განხორციელდა, სამწუხაროდ, ლეტალური გამოსავალი თავიდან ვერ ავიცილეთ“. დანარჩენ დეტალებს კლინიკა არ ამხელს.
ambebi.ge-მ ინფორმაცია შსს-შიც გადაამოწმა, სადაც დაგვიდასტურეს, რომ გოგონა კლინიკაში გარდაიცვალა, სისხლის სამართლის საქმე კი 115-ე მუხლით აღიძრა.
ამ სამწუხარო ფაქტის შესახებ მეტის გარკვევას თავად ელექტრონული ფესტივალის წარმომადგენლებისგან შევეცადეთ.
დავუკავშირდით 4GB ფესტივალის "ფეისბუქგვერდს", საიდანაც მოგვწერეს:
"პირველ რიგში, მწუხარებას გამოვთქვამთ აღნიშნული ფაქტის გამო. ადამიანი შეუძლოდ გახდა, რის შემდეგაც ის ადგილზე მყოფმა სასწრაფო სამედიცინო დახმარების მანქანამ კლინიკაში გადაიყვანა. გარდაცვალების მიზეზი ჩვენთვის ამ ეტაპზე უცნობია“.
4GB - ელექტრონული მუსიკის ფესტივალი 2011 წლიდან ყოველ წელს გაზაფხულზე იმართება. ფესტივალი ერთ-ერთი პირველი ქართველი დიჯეის, გიორგი ბაქანიძის ხსოვნას ეძღვნება (სწორედ ამიტომ დაერქვა ფესტივალს 4 GB).
პანდემიითა და უკრაინაში მიმდინარე ომით გამოწვეული სამწლიანი პაუზის შემდეგ, წელს ფესტივალი 25, 26, 27 მაისს საგურამოში გაიმართა.
თვითმხილველთა თქმით, ახალგაზრდა ქალბატონი, სავარაუდოდ, სინთეტიკურმა ოპიოიდმა - ფენტალინმა იმსხვერპლა, რომელიც ქართულ ბაზარზე დაახლოებით 5-6 წლის წინ გამოჩნდა და უკვე არაერთი ახალგაზრდა შეეწირა. შეგახსენებთ, რომ ხუთიოდე წლის წინ, 2018 წელს ერთ-ერთ კლუბში მიღებული ამ ნარკოტიკული საშუალებით ერთდროულად 4 ახალგაზრდა გარდაიცვალა.
ნარკოლოგები განმარტავენ, რომ “ფენტანილი” ერთ-ერთი ყველაზე ძლიერი სინთეტიკური ოპიოდია, რომლის გამოყენების შემთხვევაში, ძალიან მაღალია სიკვდილის რისკი. ნაწილობრივ, ეს პრობლემა დგება იმიტომ, რომ მომხმარებელმა არ იცის, რას მოიხმარს. როგორც წესი, ეს ნივთიერება საღდება სხვა, ტრადიციული ნარკოტიკის სახით და, შესაბამისად, მომხმარებელი ვერ საზღვრავს იმ დოზას, რომელსაც მისი ორგანიზმი შეიძლება იყოს მიჩვეული. ის დაახლოებით 10-ჯერ უფრო ძლიერია, ვიდრე ჰეროინი.
ფენტანილი (სინთეზური ოპიოიდი), რომელიც 1968 წელს შეიმუშავეს, ყველაზე ძლიერი ოპიოიდია. ფენტანილი 50-100-ჯერ უფრო ძლიერი მოქმედებისაა, ვიდრე იმავე მასის მორფინი (წონითი თანაფარდობით). ფენტანილის (ალფა, 3-მეთილ) ქუჩური ვერსია, რომელიც უკანონო ლაბორატორიებში მზადდება, უკიდურესად ძლიერი პრეპარატია, ხშირად მის მიერ იმიტირებულ ნარკოტიკზე მეტადაც. ზეძლიერ ქუჩის ფენტანილს, რომელიც ჩვეულებრივი სიძლიერის მქონე ჰეროინის სახით იყიდებოდა, ზედოზირებით სიკვდილის უამრავი შემთხვევა უკავშირდება. მექსიკის ფენტანილის ქარხანასთან დაკავშირებულია შემთხვევა, როცა მიყოლებით 1000-ზე მეტი წამალდამოკიდებული გარდაიცვალა. ეს ამ ნარკოტიკის ერთი კონკრეტული პარტიის გაყიდვის შედეგი იყო. ფენტანილს ასევე უკავშირდება “ოპიოიდური ზედოზირების ეპიდემია”, რომელიც აშშ-ში 2017 წელს ეროვნული მასშტაბის საზოგადოებრივი ჯანდაცვის განსაკუთრებულ სიტუაციად (public health emergency) გამოცხადდა. იხილეთ სრულად