ვინ არის 10 წლის განმავლობაში ძებნილი ქართველი, რომელიც იმ დროს დააკავეს, როცა ხვიჩა კვარაცხელიას მატჩზე დასასწრებად ჩავიდა
ხვიჩა კვარაცხელიას საგულშემატკივროდ, ნეაპოლში ჩასული ქართველი მამაკაცი, რომელიც აეროპორტში დააკავეს, 38 წლის ირაკლი ნარიმანიძეა. დაკავებულის ვინაობას და ფოტოს, რომელიც ნარიმანიძემ თბილისი-ნეაპოლის ავიარეისზე გადაიღო, "რუსთავი 2" ავრცელებს.
ნარიმანიძეს საბერძნეთის სასამართლომ 2012 წლის ოქტომბერში, ორი მოქალაქის მკვლელობის მცდელობისთვის, 10 წლით თავისუფლების აღკვეთა მიუსაჯა. ის 10 წლის განმავლობაში იძებნებოდა.
იტალიური მედია წერს, რომ საქართველოს მოქალაქე ნეაპოლში ჩარტერული რეისით, ხვიჩა კვარაცხელიას ქართველ გულშემატკივრებთან ერთად, ნაპოლი-ლაციოს მატჩზე დასასწრებად ჩავიდა.
იტალიური მედიის ინფორმაციით, მამაკაცის იდენტიფიცირება საჰაერო სასაზღვრო პოლიციის მიერ განხორციელებული პრევენციული ღონისძიებების ფარგლებში მოხდა, რომელიც მიზნად არალეგალური მიგრაციის წინააღმდეგ ბრძოლას ისახავს.