"ალისა ძალიან ჰგავს მიშას, მამას პალატაში მისი სურათი უკიდია" - რას ამბობს მიხეილ სააკაშვილის მამა შვილის უკიდურესად გაუარესებულ ჯანმრთელობაზე,
საქართველოს მესამე პრეზიდენტის, პატიმრობაში მყოფი მიხეილ სააკაშვილის მამამ ნიკოლოზ სააკაშვილმა "ფეისბუკით“ მიმართვა გაავრცელა და საზოგადოებას მთავრობის კანცელარიასთან შეკრებისკენ მოუწოდებს.
"მიშა უნდა გადარჩეს! ჩემი იქ მისვლით მეტ სოლიდარობას ვუცხადებ, შვილს მეტად ვუახლოვდები, მაგრამ მიშამ ისიც იცის, რომ არ შემიძლია სიარული, ძალიან მიჭირს. არ ვიცი, ვინ მივა და ვინ - არა, ეს 20 ნოემბერს გამოჩნდება. ეს უნდა იყოს ხმაურიანი გამოსვლები პოლიტიკის გარეშე, უნდა მოხდეს პოლიტიკისგან სრული დისტანცირება, რომ ვიღაცეებმა ბოროტად არ ისრგებლონ და რაღაც პროვოკაციები არ მოაწყონ. აქ სიცოცხლეზე და ექსპრეზიდენტის გადარჩენაზეა საუბარი. ვისაც მიშა არ მოგწონთ, არ გიყვართ და მის მიმართ ბოღმა გაქვთ, როცა გამოჯანმრთელდება ამაზე მერე დაჯექით და ილაპარაკეთ. წაქცეულ კაცს არ უნდა ეჭიდაო,“- გვეუბნება ექსპრეზიდენტის მამა ambebi.ge-სთან ინტერვიუში:
ნიკოლოზ სააკაშვილი:
- ჩემს შვილის დაკავების შემდგომ, გარკვეულ პერიოდში 14 დიაგნოზი გამოხტა, ამას ძვლის ტუბერკულოზიც დაემატა. მიშას პრობლემა აქვს მარცხენა კიდურის სახსარში და ლაპარაკია იმაზე, რომ უნდა ჩატარდეს ენდოპროტეზირება, რასაც აქ სათანადოდ ვერ აკეთებენ. ჩამოსულმა უცხოელმა სპეციალისტები თქვეს, სასწრაფოა და ეს აქამდე უნდა გაეკეთებინათო. კაცი ხელს ვეღარ ხმარობს, მიდის ბევრი პროცესი... გუშინ ყურში მომხვდა ერთ-ერთი პარლამენტარის ნათქვამი - სააკაშვილი თვითდაზიანებას ეწევა, როგორც ყველა კრიმინალი პატიმარიო. რა შუაშია კრიმინალი, ლაპარაკობ ქვეყნის პრეზიდენტზე, რომელიც 9 წელი გაშენებდა, საერთაშორისო ასპარეზზე გაგიყვანა და შეგიქმნა ქართული სიმბოლიკა, რომელიც აქამდე არ გქონდა. ექიმი ვარ და არ მეგულება კლინიკა, სადაც მხრის სახსარზე ენდოპროტეზირება კეთდებოდეს, ვერ ვპოულობთ, ამიტომაა საჭირო მისი გაყვანა უცხოეთში, სადაც მაღალპროფესიონალები არიან, მაგალითად, გერმანიაში.
- ადვოკატმა გელბახიანმა ეჭვი გამოთქვა მის მოწამვლაზე, თქვენც იზიარებთ ამ მოსაზრებას?
- დიახ, ვიზიარებ. ეს მე ჯერ როდის ვთქვი, მაგრამ კაციშვილმა ყურად არ იღო. აკადემიკოსი კაცი ვარ, წლების განმავლობაში ექიმად ვიმუშავე სერიოზულ კლინიკებში და ექიმის თვალი კარგად მაქვს განვითარებული. რადგან თვითადზიანებაზე საუბრობენ, დავიწყოთ იქიდან, რომ ადამიანი ჩამოვიდა და შევიდა საპატიმროში ჯანმრთელი, მერე იშიმშილა. შიმშილობა არის პოლიტიკური აქტი და ჩვენმა მესვეურებმა ეს თუ არ იციან, ცუდია. პოლიტიკოსის მოხსენიება, რომ ის "ფეიკებს“ ახდენს და შიმშილობას თვითდაზიანების მიზნით აცხადებს ისე, როგორც კრიმინალი, ძალიან დიდი შეურაცხყოფაა ქვეყნისათვის და, პირველ რიგში, საქართველოს პრეზიდენტისთვის.
მიშა კარგი იყო, თუ ცუდი, ხარვეზები ჰქონდა თუ - არა, ყველას თავისი შეხედულება აქვს და ამას ვერავის აუკრძალავ, ამაზე კაცს ვერ დაძრახავ, მაგრამ არ უნდა ახვევდე საზიზღრობას სხვებს. მიშამ 50 დღე იშიმშილა, სპეციალობით გასტროენტეროლოგი ვარ და მქონია მოშიმშილეებთან მუშაობის გამოცდილება (9 აპრილს, ჩემი კონტროლის ქვეშ იყვნენ მოშიმშილეები), ამაზე მეტი რა ვიცი. არსებობს მოშიმშილეების სპეციალური სქემა. მე რაც აქ ვნახე, მიშასთან რაც გაკეთდა, არ იყო სწორი, იმ სქემის განხორციელება ბოლომდე არ დასრულდა, აბსოლუტურად, სხვა სქემით უნდა ემუშავათ, რაც ციხის პირობებში არ გამოდიოდა.
ამან ბევრი რამ გააუარესა, ამიტომ ატარეს აქეთ-იქეთ. ამ პერიოდში კაცმა "აიკიდა“ 15 დაავადება, რასაც ბევრმა ფაქტორმა შეუწყო ხელი - პოსტშიმშილის შემდგომმა არასწორმა რეაბილიტაციამ, ციხეში განხორციელებულმა ფსიქოლოგიურმა ზეწოლამ და წამებამ, რაც ნერვულ სისტემაზე მოქმედებს. ნორმალური, მაღალი ინტელექტის ადამიანი ამას ვერ იტანს, მიშა სუპერსაფეხურზე განვითარებული პიროვნებაა და როგორც ჩანს, მას ეს გაუჭირდა. მიშა ამას კი არ აღიარებს, მაგრამ მე ხომ დავინახე... ვიღაცამ გაისროლა ფრაზა - სააკაშვილს უჭირს ადაპტაცია და ციხის პირობებს ვერ ეგუებაო. ნურას უკაცრავად, ის ციხის პირობებს ძალიან კარგად შეეგუებოდა, რომ არა ამდენი დაავადება. განაგრძეთ კითხვა