ვინ არის ალბანეთში ჯაშუშობის ბრალდებით დაკავებული რუსი ბლოგერი და რა აკავშირებდა საქართველოსთან?
ალბანეთში, ჯაშუშობის ბრალდებით დაკავებული ჯგუფის ერთ-ერთი წევრი, რუსეთის მოქალაქე "ლანა სატორი", დაპატიმრებამდე, გარკვეული პერიოდი საქართველოში იმყოფებოდა. ინფორმაციას ამის შესახებ "ფეისბუქით" სამხედრო ექსპერტმა, ზურა ბატიაშვილმა გაავრცელა. პოსტს თან დაურთო დაკავებულის "ინსტაგრამის" ლინკი, სადაც ფოტოებში ჩანს, რომ გოგონა საქართველოს დედაქალაქსა და თითქმის ყველა რეგიონში იმყოფებოდა.
"გახსოვთ, ცოტა ხნის წინ ალბანეთში სამხედრო ბაზაზე შეპარული რუსები რომ დააკავეს შპიონაჟის ბრალდებით? დღეს შემთხვევით აღმოვაჩინე, რომ იმ ჯგუფის მინიმუმ ერთი წევრი, რუსეთის მოქალაქე ფსევდონიმით ლანა სატორი დაპატიმრებამდე დიდი ხნის განმავლობაში საქართველოში ცხოვრობდა.
საქართველოში მშვიდად დადიოდა სოფლებში, იღებდა უამრავ ფოტოს (რომლებიც შეგიძლიათ ნახოთ აქ https://www.instagram.com/lanasator/?hl=en, მანდვე დევს ინფორმაცია მისი ალბანეთში დაკავების შესახებ, სადაც იხვეწება მიშველეთო)...
ეცნობოდა ხალხს, სწავლობდა აქაურობას და არც არავის გასჩენია ეჭვი, ვინაა და რას აკეთებს ეს რუსი "ტურისტი" საქართველოში. რომ არა ალბანეთში ჩავარდნილი ოპერაცია, ისევ თავისუფლად გააგრძელებდა თავის საქმიანობას საქართველოშიც და სხვაგანაც.
ასეთ უპატრონო ქვეყანაში ვცხოვრობთ. ფოტოზე შპიონაჟის ბრალდებით დაკავებული ლანა სატორი თავის კატასთან ერთად საქართველოში" - დაწერა ბატიაშვილმა.
რა არის ცნობილი ალბანეთში დაკავებულების შესახებ?20 აგვისტოს ალბანეთის თავდაცვის სამინისტრომ გამოაცხადა, რომ რუსეთის ორი და უკრაინის ერთი მოქალაქე ცენტრალურ ალბანეთში დააკავეს. ისინი გრამში იმ ქარხნის ტერიტორიაზე იმყოფებოდნენ, რომელი ოდესღაც კალაშნიკოვის სახეობის ავტომატებს აწარმოებდა. ალბანეთის პრემიერ მინისტრმა ედი რამამ განაცხადა, რომ ორი მამაკაცი და ერთი ქალი "ეჭვმიტანილები არიან ჯაშუშობაში".
ერთ-ერთი დაკავებულია სვეტლანა ტიმოფევა, რუსეთის ერთ-ერთი ყველაზე ცნობილი ურბანული მკვლევარი, ფსევდონიმით "ლანა სატორი".
მისმა მეგობრებმა "რადიო თავისუფლებას" გოგონას დაკავების ფაქტი დაუდასტურეს. სატორი ცნობილია თავისი შთამბეჭდავი ფოტოებით, რომლებიც ხშირადმჭიდროდ დაცული სამხედრო ობიექტებშია გადაღებული. 2012 წელს იგი რუსულ სარაკეტო ქარხანაში შეიპარა, საიდანაც აქამდე უცნობი ფოტოები გადაიღო. სატორი საქართველოში უკრაინაში რუსეთის შემოჭრის შემდეგ იმყოფებოდა. მისი მეგობრები ჯაშუშობის ბრალდებას არ ეთანხმებიან და ამბობენ, რომ ბლოგერი ერთ-ერთი იყო, ვინც ომი დაგმო. განაგრძეთ კითხვა