76 წლის რუსი მხატვრის ამბავი: ელენა ოსიპოვა, ქალი, რომელიც პუტინის რეჟიმს მარტო ებრძვის
76 წლის რუსი მხატვარი, ელენა ოსიპოვა 20 წელია რაც რუსეთში პუტინის რეჟიმს აპროტესტებს. მას აქციებზე მუდმივად აკავებენ, მაგრამ პროტესტს აგრძელებს. ელენა ოსიპოვას "სანკტ-პეტერბურგის სინდისს" უწოდებენ. ქალი მხატვარი და მასწავლებელია, ის ბავშვებს პენსიაზე გასვლამდე ასწავლიდა ხატვას, ახლა კი ქალაქის ცენტრალურ ქუჩებში ომის საწინააღმდეგო პლაკატებით გამოდის.
2022 წლის მარტში იგი რამდენჯერმე დააკავეს აქციებზე. ოსიპოვასა და OMON-ის მებრძოლების 2 მარტს გადაღებულმა კადრებმა დიდი რეზონანსი გამოიწვია სოციალურ ქსელებში.
ელენა ოსიპოვა:
- 24 თებერვალს, შუაღამისას, დამირეკა ერთმა ქალმა, ალბათ ჟურნალისტმა და მკითხა, რას ვგრძნობდი მომხდარის გამო. მე ვუპასუხე, რომ რუსი ფიურერი წავიდა უკრაინის ანექსიაზე და მე ამისთვის დიდი ხანია მზად ვიყავი. ჯერ კიდევ 2014 წელს ჩემთვის ცხადი იყო, საით მიდიოდა ყველაფერი (ვლადიმერ პუტინის პოლიტიკა უკრაინის მიმართ). ომის საწინააღმდეგო პლაკატების უმეტესობა მაშინ გავაკეთე. მაგრამ არავის სჯეროდა, რომ ეს შეიძლებოდა მომხდარიყო.
ელენა ოსიპოვა სანკტ-პეტერბურგში აქციაზე 2022 წლის, 24 თებერვალი
იმავე დღეს, 24 თებერვალს გამოვედი სანკტ-პეტერბურგის ცენტრში ბანერით, რომელზეც ეწერა: "ოჰ მანია, ოჰ ომის მუმია! დაიწვები, რუსეთო! სიგიჟეს, სიგიჟეს სჩადიხარ!" - ეს არის მარინა ცვეტაევას ლექსებიდან ფრაზა. მართალია, მან გერმანიაზე დაწერა, მე კი რუსეთზე. ეს პლაკატი ბორის ნემცოვის მკვლელობის შემდეგ დავხატე, 2015 წლის 27 თებერვალს.
აქციაზე სრული უიმედობის განცდით გავედი, მაგრამ ხალხისგან შთაგონებული ვიყავი. იმ დღეს ქუჩაში ბევრი იდგა. მე ეკატერინე II-ის ძეგლთან ვიდექი და ისინი ნეველის პროსპექტის გასწვრივ გაურბოდნენ პოლიციას და ყვიროდნენ: "არა ომს!" რამდენიმე კაცი მოვიდა, ტიროდნენ და მკითხეს: "რა ვქნათ? როგორ შეგვიძლია დავეხმაროთ უკრაინას? ამ ყველაფერმა დიდი იმედი მომცა. დავინახე, რომ ბევრი არ ეთანხმება რუსეთის ქმედებებს უკრაინაში.
თავიდან მინდოდა "გოსტინნი დვორში" წასვლა, მაგრამ იქ ბევრი პოლიცია იყო, მაშინვე წამიყვანდნენ. ასე მოვახერხე საკმაოდ დიდხანს დგომა. მაგრამ საბოლოოდ პოლიცია გამოჩნდა. ზოგიერთმა ჟურნალისტმა მოახერხა გაქცევა და ჩემი წაყვანის ამსახველი სურათების გადაღება. ხალხი ცდილობდა ხელი შეეშალა, მაგრამ მე თვითონ ვუთხარი, არ ინერვიულოთ, დავარწმუნე, არ ჩარეულიყვნენ - მეშინოდა, რომ მათაც დააპატიმრებდნენ. პოლიციის მანქანაში ჩამსვეს და სახლში წამიყვანეს. მითხრეს, რომ ქუჩაში აღარ გამოვჩენილიყავი.