როგორია მექსიკაში საქართველოს ელჩის ქონებრივი მდგომარეობა?
მას შემდეგ, რაც პოლიტიკოსი ზაზა გაბუნია "ქართული ოცნების" განახლებულ საპარლამენტო სიაში ვერ მოხვდა, ოპოზიციაში მის გადასვლაზე არავის უფიქრია, თუმცა, ყურადღებას შეჩვეული პოლიტიკოსი პერიოდულად სოციალურ ქსელში აქტიურობით ახსენებდა ამომრჩეველს თავს.
პოლიტიკიდან დროებით ჩამოშორებული გაბუნია გასულ წელს, ინტელექტუალური თამაშის "რა სად როდის" გამარჯვებული გახდა და "ოქროს ბუს" დაეუფლა. ასევე დაკავებული იყო ცხენოსნობით. დაწერა რამდენიმე რომანი, თუმცა ეს უფრო ადრე, პოლიტიკაში აქტიურად ყოფნისას.
ზაზა გაბუნია მოგვიანებით არც "ქართული ოცნების" საკრებულოს სიაში მოხვდა, თუმცა მოგვიანებით აღმოჩნდა, რომ მას უფრო დიდი თანამდებობისთვის ამზადებდნენ. 5 ოქტომბერს პოლიტიკოსმა სოციალურ ქსელში ოფიციალურ გვერდზე გამოაქვეყნა ინფორმაცია, რომ საქართველოს საგანგებო და სრულუფლებიან ელჩად დაინიშნა და დიპლომატიურ მისიას მექსიკის შეერთებულ შტატებში, ცენტრალური ამერიკისა და კარიბის ზღვის ქვეყნებში: პანამაში, კოსტა-რიკის რესპუბლიკაში, დომინიკის რესპუბლიკაში, გვატემალაში, ჰონდურასის რესპუბლიკაში, სალვადორსა და ბელიზში უხელმძღვანელებს.
საელჩოს რეზიდენცია კი ქალაქ მეხიკოში მდებარეობს. პოლიტიკოსმა ქვეყანა ნოემბრის დასაწყისში დატოვა და მექსიკაში გაემგზავრა. ელჩობიდან ორი თვის თავზე, მის დიპლომატიურ ანგარიშზე ირიცხება: უკრაინის საგანგებო და სრულუფლებიან ელჩთან, ოქსანა დრამარეტსკასთან შეხვედრა. მექსიკის საგარეო საქმეთა ვიცე-მინისტრ, კარმენ მორენა ტოსკანოსთან შეხვედრა.