"ეს კეთდება რუსი ოლიგარქებისთვის... აქ კაპიკებში იყიდიან უძრავ ქონებას და ჩვენ მომსახურე პერსონალი ვიქნებით" - აფხაზების მწვავე რეაქციები ბჟანიას ინიციატივაზე
ოკუპირებულ აფხაზეთში ე.წ. პრეზიდენტის განცხადებამ რუსეთის მოქალაქეებისთვის უძრავი ქონების შესყიდვის შესახებ ადგილობრივ მოსახლეობაში მძაფრი კრიტიკა გამოიწვია. მათი თქმით, ბოლო ხანებში ასლან ბჟანიას მოსკოვში გახშირებული ვიზიტების გათვალისწინებით, პროცესები ისე ვითარდებოდა, რომ ეს შედეგი გარდაუვალი იყო, მაგრამ იმ ფონზე, როდესაც მისი გადადგომის მოთხოვნით აქციების იმართება, მისი თავდაჯერებულობა კიდევ უფრო გამაღიზიანებელია.
Эхо Кавказа -სთან საუბარში, ადგილობრივი პუბლიცისტი, ნაირა ამალია ამბობს, რომ ბჟანიას განცხადებას, რომ აფხაზეთს უნდა მიეცეს შესაძლებლობა, უცხო ქვეყნის მოქალაქეებმა უძრავი ქონება შეისყიდონ და ქვეყანაში ინვესტიცია დააბანდონ, მის უარყოფითი რეაქციები მოჰყვა. მისივე თქმით, რეგიონი ისევ 2016 წელში ბრუნდება, როდესაც რაულ ხაჯიმბას გადადგომის მოთხოვნით აქციები იმართებოდა.
"არაერთხელ ვისაუბრეთ ამაზე - აფხაზეთი პატარა ქვეყანაა, მცირე მოსახლეობით და უცხო ქვეყნის მოქალაქეებისთვის უძრავის ქონების მიყიდვის უფლების მინიჭებით, ჩვენ თანდათან დავკარგავთ დამოუკიდებლობას. ვინ იყიდის უძრავ ქონებას აფხაზეთში? გასაგებია, რომ ამას ვერ შეძლებს რუსეთის უბრალო მოქალაქე, ვინაიდან ისინი ხელფასზე ცხოვრობენ და ზედმეტი ფული არ აქვთ, კრედიტებს იხდიან. ეს ყველაფერი კეთდება რუსი ოლიგარქებისთვის, მათ ყველანაირ წინაპირობას უქმნიან აქ შემოსვლისთვის. ალბათ აღადგენენ იმ დიდ ქარხნებსა და ფაბრიკებს, რომელიც ომის შემდეგ დაინგრა. ამაზე საუბრობდნენ, ტყვარჩელში, შახტებში ნახშირის მოპოვებაზე, რომელსაც თურმე უცხოელი ინვესტორის გარეშე ვერ აღადგენენ...
თავზე გვენგრევა ყველაფერი. ჩვენი მოსახლეობა 240 ათასიც არ არის, ორი ევროპული ქარხნის თანამშრომლების რაოდენობაა და რის შეცვლას შევძლებთ რაიმე საფრთხის შემთხვევაში? რას ვაკეთებთ, ეკონომიკის ვითომ განვითარების საპირწონედ სამშობლოს თავისუფლებას ვდებთ სასწორზე?! ჯერ ახლა ვართ მიბმული რუსეთზე ენერგორესურსებით და წარმოიდგინეთ, რა მოხდება, როდესაც ოლიგარქები კაპიკებში იყიდიან ჩვენს უძრავ ქონებას, ხელში ჩაიგდებენ ჩვენს ბიზნესს... მშვიდობით, სამშობლო! ჩვენს ქვეყანაში მომსახურე პერსონალი ვიქნებით, როგორც ეს დაბალი განვითარების ქვეყნებში ხდება, როდესაც იქ კაპიტალიზმი შედის. ისე, როგორც ეს მოხდა ინდოეთის გარკვეულ პროვინციებში, მათ მიწები დათმეს შუშიანი ავტობუსების სანაცვლოდ. არ გვინდა, მათი ბედის გაზიარება..." - მიაჩნია ამალიას.
ადგილობრივების თქმით, პოლიტიკური გადაწყვეტილებაა ის, რომ "ომის შემდეგ, მათი თანამემამულეები თურქეთიდან ჩამოვიდნენ, აფხაზეთში ინვესტიციების დასაბანდებლად, მაგრამ ამის შესაძლებლობა არ მისცეს.
აფხაზები სოციალურ ქსელებში წერენ, რომ ამდენი წლის განმავლობაში, დაბალ დონეზე განვითარებული ტურიზმის გარდა, ვერ შეძლეს ექსპორტ-იმპორტის განვითარება, შიდა ეკონომიკისთვის.
"ასეთ დამოკიდებულებას კი, დამოუკიდებლობის ნაწილობრივ ან მთლიანად დაკარგვა მოჰყვება. რუსი ოლიგარქების შემოსვლას მოწინააღმდეგეების კვალდაკვალ ჰყავს მომხრეებიც. მათი მოსაზრებით, აფხაზეთის მოქალაქეებს არ აქვთ საკმარისი თანხა, არ არსებობენ ადგილობრივი ინვესტორები, ანუ არ არის საკმარისი ფული უძრავის ქონების ასათვისებლად...
როდესაც ვამბობთ, რომ რუსი ოლიგარქები არ გვჭირდება, გავიხსენოთ, რომ ადგილობრივი ოლიგარქებიც გვყავს, რომლებიც კრიმინალებთან არიან ალიანსში და ქვეყნის ეკონომიკას განვითარების შესაძლებლობა არ აძლევენ. ამიტომ, იქნება შვებაც იყოს" - წერს ადგილობრივი თამარ გოლანძია.
"გვინდა თუ არა, ეს მაინც მოხდება - ოლიგარქები კი არა, სულ დამპყრობლები რომ ვეძახოთ, აფხაზურ ბიზნესში მათი შემოსვლა მაინც გარდაუვალია. ასე ვერ გავაგრძელებთ, 30 წელია უკუსვლა გვაქვს... შესაძლოა, ბჟანიას თავადაც არ უნდოდეს კვირაში ერთხელ მოსკოვში სირბილი და პუტინის კარებზე კაკუნი, მაგრამ ქვეყანაში ყველა სფეროში კრიზისია, მას ემატება ენერგოკრიზისი. წაგვლეკა მაინინგის ბიზნესმა; ზამთარი მოდის და ვხედავთ, რომ დღე-ღამეში 6-8 საათის განმავლობაში დენისა და წყლის გარეშე ვართ, ფიზიკური გადარჩენის საშველი კი, სამწუხაროდ, ჯერჯერობით მხოლოდ მოსკოვიდან ჩანს..." - წერს ერნა გულია.
"ის, რომ ბჟანია ამდენს გვიბედავს, არის ჩვენი და ოპოზიციის ბრალი, ვეტერანებმა ისე გაიფუჭეს სახელი, რომ სპეცრაზმმა ცხვირ-პირი დაუმტვრია, მაგრამ მხოლოდ საკუთარი ოჯახის წევრები გამოჰყვნენ აქციაზე. ამიტომაც, ბჟანია-ანქვაბის გუნდი იმას აკეთებს, რასაც საჭიროდ თვლის" - მიაჩნია რომან წვიჟბას.