ლოლიტა დანილინა რუსეთიდან ხშირად ჩამოდიოდა ჩემთან სტუმრად, ბატონ მიშასაც გავაცანი" - მეუფე ნიკოლოზი სუს-ის ჩანაწერებზე
12 სექტემბერს, გვიან ღამით ინტერნეტსივრცეში, ღია პორტალზე 300-მდე ფაილი აიტვირთა. საუბარია სამი ათასამდე დოკუმენტზე, რომელიც საპატრიარქოს მაღალი იერარქიის სასულიერო პირების საქმიანობასა და პირად ცხოვრებას შეეხება.
სუს-იდან გაჟონილ მასალებში, რომელიც მაღალი სასულიერო იერარქიის წარმომადგენელების ფარულ მიყურადებას შეეხება, 100-მდე სასულიერო პირის პირად ცხოვრებაზეა ინფორმაცია. სუს-ის საიდუმლო მასალებში კუმურდოს, კარისა და ახალქალაქის მიტროპოლიტი ნიკოლოზ ფაჩუაშვილიც ფიგურირებს, რომელსაც უწყება რუსეთის აგენტობაში ადანაშაულებს. ოპერატიულ ცნობაში წერია, რომ მეუფე დიდი ფულის სანაცვლოდ, რუსეთის მოქალაქე ლოლიტა დანილინას ლუგარის ლაბორატორიის შესახებ, ასევე პატრიარქის პირადი შეხვედრების შესახებ ინფორმაციას აწვდიდა. როგორც დგინდება, მეუფეს არამარტო უსმენდნენ, მის პირად მიმოწერებსაც კითხულობდნენ. ოპერატიული ცნობის თანახმად, დანილინამ მეუფე ნიკოლოზს ინფორმაციების გადაცემის სანაცვლოდ, 2 ივლისს მოსკოვიდან 30 ათასი დოლარი ჩაურიცხა და მიუთითა, თითქოს თანხა საეკლესიო შესაწირისთვის იყო განკუთვნილი.
მეუფე ნიკოლოზი ადასტურებს, რომ სუს-ის საიდუმლო ფაილებში დასახელებული საუბრები მასსა და რუსეთის მოქალაქეს შორის ნამდვილად შედგა, თუმცა უარყოფს იმას, რომ რუსეთის მოქალაქეს, 30 ათასი დოლარის სანაცვლოდ, ლუგარის ლაბორატორიისა და პატრიარქის შეხვედრების შესახებ ინფორმაცია გადასცა.
მიტროპოლიტი ნიკოლოზი ამბობს, რომ იცნობს ლოლიტა დანილინას.
„ერთი პერიოდი, ძალიან ხშირად ჩამოდიოდა ჩემთან სტუმრად. ცხოვრება ისეთია, რომ იცვლება რაღაცები. მას იცნობდა ყველა, ვინც მე მიცნობს და ყველამ იცის, რომ ეს ადამიანი რუსეთიდან ჩემთან ჩამოდიოდა სტუმრად. ალბათ ასე, 2007 წლიდან, თუ 2008 წლიდან, ზუსტად აღარ მახსოვს. ძალიან მკაფიო, საინტერესო პიროვნება იყო და ვინც შემეძლო, ყველა გავაცანი. ბატონ მიშასაც გავაცანი (იგულისხმება სააკაშვილი) იმიტომ, რომ ეს იყო ერთ-ერთი საშუალება, რომ ჩვენ ურთიერთობების ნორმალიზება გაგვეკეთებინა", - თქვა მიტროპოლიტმა ნიკოლოზმა "ტვ პირველის" ეთერში.
კითხვაზე, სიმართლეა თუ არა, რომ მან ლუგარის ლაბორატორიაში რუსული დელეგაციის სტუმრობის შესახებ ვინმე ლოლიტა დანილინას მიაწოდა ინფორმაცია, მიტროპოლიტმა ნიკოლოზმა უპასუხა:
„მე ახლაც არ მაქვს ლუგარის ლაბორატორიაზე ინფორმაცია, გარდა იმისა, რაც ყველამ ვიცით, რომ იქ კოვიდ ტესტებს აკეთებენ, არაფერი სხვა არ ვიცი ამ ლუგარის ლაბორატორიაზე საერთოდ. შემიძლია სიცრუის დეტექტორი გავიარო. ის, რომ ვიცნობდი ქალბატონ ლოლიტას, ეს ყველამ იცოდა და ამას ძალიან კარგად ებმის ის ისტორია, რომ მე შეიძლება ლუგარის ლაბორატორიაზე გადავუგზავნო ინფორმაცია. რაც შეეხება ჩემს პირად ანგარიშზე რუსეთიდან შესრულებულ ტრანზაქციას, მე რამდენადაც ვიცი, გადმორიცხვის გაკეთება არ შეიძლება, არ კეთდება, არ სრულდება ასეთი ოპერაცია", - ამბობს მიტროპოლიტი.
ფარულ თვალთავალსა და მოსმენებს რაც ეხება, მისი სიტყვებით, „უსაფრთხოების სამსახური უნდა ფლობდეს ყველანაირ ინფორმაციას, ოღონდ, ამის შესახებ არავინ უნდა იცოდეს“.
„იცით რაშია საქმე? მე ჩემი ქვეყნის უშიშროების სამსახურს ვენდობი მაშინაც კი, როდესაც ისინი არაპროფესიონალურად იქცევიან. მინდა, რომ განვითარდეს ეს სამსახური. არც ერთ ადამიანს არ ვიცნობ უშიშროების სამსახურში, ვისაც შეუძლია, რომ ასეთი მოსმენები განახორციელოს... არ ვიცნობ, თუ ვიცნობ, თქვას თვითონ. ჰოდა, კინოები მაქვს ნანახი, ერთი ფილმი მაქვს ნანახი, სადაც ამ თემაზეა საუბარი. ადამიანს, ქალს უნიშნავენ, პირად მცველს, რომელიც ამ ქალს კამერას უყენებს ტუალეტში. ეს ქალი გადაირევა ამაზე, რას ჰქვია, მე არ მჭირდებაო! თქვენ ჩემი დაცვის ობიექტი ხართ, ამიტომ არ აქვს მნიშვნელობა თქვენზე თავდასხმას სად განახორციელებენ. ეს იქნება ტუალეტი, თქვენი საძინებელი, მე ყველაფრი უნდა ვიცოდეო, მე ეს მესმის, მე ამას ვეთანხმები, თუ ჩვენ ვართ დაცვის ობიექტი", - განაცხადა მეუფე ნიკოლოზმა.
სკანდალურ მოვლენას ფბ-ზე სტატუსით გამოეხმაურა საპატრიარქოს საზოგადოებასთან ურთიერთობის სამსახურის ხელმძღვანელი ანდრია ჯაღმაიძე:
"ძალიან ცუდია, თუ სიმართლეა უკანონო მოსმენების შესახებ გავრცელებული ინფორმაცია. ისე, ზოგიერთი ტელევიზიიდან ფაბრიკაციებიც ბევრი გვინახავს, ცილისწამებებიც. სამწუხაროდ, თავად ტელევიზიებმა შეგვაჩვიეს, რომ ახალი ამბები "იქმნება" და არა უბრალოდ შუქდება. ტყუილის და მართალის შერევით კი ყველაზე საშიში ცილისწამებები იქმნება. ამიტომ კომენტარის გაკეთებას არ ვიჩქარებ", - დაწერა ანდრია ჯაღმაიძემ.
AMBEBI.GE სუს-იდან გამოჟონილი მასალების ავთენტურობასთან და მოსმენა-თვალთვალის კანონიერებასთან დაკავშირებით კომენტარისთვის უწყების პრესსამსახურს დაუკავშირდა, სადაც გვიპასუხეს, რომ ამ საკითხთან დაკავშირებით, სუს-ი ამ ეტაპზე კომენტარს არ აკეთებს.