NDI - გამოკითხულთა 76% ევროკავშირში გაწევრიანებას უჭერს მხარს, ნატო-ში გაწევრიანებას კი - 69%
საქართველოს მოსახლეობა კვლავაც მყარად უჭერს მხარს ევროკავშირსა და ნატო-ში გაწევრიანებას, - ამის შესახებ "ეროვნული დემოკრატიული ინსტიტუტის" (NDI) 2020 წლის ივნისის საზოგადოების განწყობის გამოკითხვის შედეგებშია აღნიშნული.
კვლევის შედეგებით, ევროპული და ევრო-ატლანტიკური კავშირების წინააღმდეგ მიმართული დეზინფორმაციის კამპანიების მიუხედავად, საქართველოს მოსახლეობა კვლავაც მყარად უჭერს მხარს ევროკავშირსა (76 პროცენტი) და ნატო-ში გაწევრიანებას (69 პროცენტი). ამასთან, ევროკავშირში გაწევრიანება მიუღებელია გამოკითხულთა 8%-ისთვის, ხოლო ნატოში გაწევრიანება-11%-ითსვის.
კვლევის შედეგების თანახმად, გამოკითხულთა 59% ფიქრობს, რომ საქართველო მეტ სარგებელს მიიღებს ევროპული და ევრო-ალანტიკური ინტეგრაციით, ხოლო 11% მიიჩნევს, რომ საქართველო მეტ სარგებელს მიიღებს, თუ რუსეთთან უკეთესი ურთიერთობის ჩამოყალიბების სანაცვლოდ, უარს იტყვის ევროპულ და ევრო-ატლანტიკურ ინტეგრაციაზე.