მოსალოდნელია თუ არა ტემპერატურის კლება - იხილეთ მიმდინარე კვირის ამინდის პროგნოზი
29 ოქტომბრიდან 4 ნოემბრის ჩათვლით დასავლეთ საქართველოში უნალექო ამინდია მოსალოდნელი. ჰაერის მაქსიმალური ტემპერატურა 29-31 ოქტომბერს დაბლობ რაიონებში 22-27 გრადუსი სითბო დაფიქსირდება, მთიან რაიონებში, დაახლოებით - 18-23 გრადუსი და მაღალმთიან რაიონებში 13 -18 გრადუსი ტემპერატურა იქნება. აღნიშნული ინფორმაცია Allnews.ge-ს გარემოს ეროვნული სააგენტოს მოკლევადიანი პროგნოზების სამმართველოს უფროსმა, დოდო გვაზავამ მიაწოდა.
"1 ნოემბრიდან, მართალია, უნალექო ამინდი შენარჩუნდება, მაგრამ ჰაერის ტემპერატურა 3 გრადუსით დაიკლებს და პირველიდან 4 ნოემბრამდე დასავლეთ საქართველოში ჰაერის მაქსიმალური ტემპერატურა მოსალოდნელია 18-23 გრადუსი, მთიან რაიონებში -15-20 და მაღალმთიან რაიონებში კი 11-16 გრადუსი. პირველიდან 4 ნოემბრის ჩათვლით გაძლიერდება აღმოსავლეთის მიმართულების ქარი, ზოგან იქროლებს ძლიერი 17-22 და შესაძლოა 25 მეტრ/წამი სიჩქარის ქარი, განსაკუთრებით 2-3 ნოემბერს"- აღნიშნა დოდო გვაზავამ.
სინოპტიკოსის ინფორმაციით, აღმოსავლეთ საქართველოში პირველ ნოემბრამდე უნალექო თბილი ამინდებია მოსალოდნელი. ჰაერის მაქსიმალური ტემპერატურა ბარში დაახლოებით 18 -23 გრადუსი იქნება, ღამის ტემპერატურა შედარებით გრილია და 0-5 გრადუსი დაფიქსირდება. გამორიცხული არ არის შიდა ქართლში კვლავ განმეორდეს -1;-2 გრადუსი.
დოდო გვაზავას თქმით, 1-დან 3 ნოემბრის ჩათვლით ჰაერის ტემპერატურა დაიკლებს და ბარში მაქსიმალური ტემპერატურა მოსალოდნელია დაახლოებით 12-დან 17 გრადუსამდე და არ არის გამორიცხული, რომ 2 ნოემბერს განსაკუთრებით თბილისში და კახეთის რეგიონში ზოგან აღინიშნოს მცირე წვიმა და ნისლი.
დედაქალაქში ამინდები შენარჩუნდება 31 ოქტომბრის ჩათვლით, ჰაერის მაქსიმალური ტემპერატურა 20-22 გრადუსია მოსალოდნელი. ჰაერის ტემპერატურა 1-3 ნოემბერს დაახლოებით, 14-16 გრადუსამდე დაიკლებს. გამორიცხული არ არის, რომ აქაც მცირე წვიმა და ნისლი აღინიშნოს, განსაკუთრებით, 2 ნოემბერს.