რა ჯდება სტუდენტებისთვის ბინის დაქირავება თბილისში?
თბილისი ყოველი სასწავლო წლის დაწყებამდე ბინების დაქირავების თუ გაქირავების საკითხი აქტიურდება.
იმის გამო, რომ აკრედიტებული უმაღლესი სასწავლებლების დიდი ნაწილი სწორედ თბილისში მდებარეობს, ამიტომაც სტუდენტების უმეტესობა განათლების მისაღებად საცხოვრებლად მინიმუმ 4 წლით თბილისში გადადის.
რეგიონებიდან დედაქალაქში ჩასულ სტუდენტებს სწავლის გადასახადის გარდა, დამატებით საცხოვრებელ ადგილის პოვნა და ამისთვის შესაბამისი ფინანსების მოძიება უწევს.
"ბიზნესპრესნიუსი" დაინტერესდა, რა ღირს ბინის დაქირავება თბილისის სხვადასხვა უბანში და სტუდენტები საცხოვრებლად რომელ უბანს ირჩევენ.
SAQME.GE-ის მიერ მოწოდებული ინფორმაციის მიხედვით, თბილისში მხოლოდ ერთი ოთახის დაქირავება კერძო სახლში ან ბინაში 150-250 ლარის ფარგლებშია და მისი ფართობი 15-20 კვადრატულ მეტრს შეადგენს.
რაც შეეხება მთლიანად ბინის ქირაობის ფასებს, ერთოთახიანი ბინის დაქირავება 250-400 ლარის ფარგლებშია შესაძლებელი. ამ კატეგორიაში უბნების მიხედვით გასაქირავებელი ბინების რაოდენობა ასეთია: ისანი-სამგორი - 180, ვაკე-საბურთალოზე - 100, გლდანი-ნაძალადევი - 350, ხოლო დიდუბე-ჩუღურეთში - 88.
400-550 ლარამდე ქირავდება შედარებით კეთილმოწყობილი 1 და 2 ოთახიანი ბინები. ამ კატეგორიაში ვაკე-საბურთალოზე - 460 განცხადებაა, ისანი-სამგორი - 400, გლდანი-ნაძალადევი - 400, ხოლო დიდუბე-ჩუღურეთში - 220 განცხადება ფიქსირდება.
ასევე "ბიზნესპრესნიუსი" დაინტერესდა სტუდენტები საცხოვრებლის შერჩევისას რას ითვალისწინებენ და რა პრობლემებთან არის დაკავშირებული შესაფერისი ბინის პოვნა. სწორედ ამიტომ რამდენიმე რეგიონიდან ჩამოსული სტუდენტი გამოვკითხეთ, რომელიც თბილისში ქირით ცხოვრობს.
ლანა ხაჭაპურიძე მე-3 კურსის სტუდენტი: "რაც თბილისის სახელმწიფო უნივერსიტეტში ჩავაბარე, მას შემდეგ ქირით ვცხოვრობ. მოგეხსენებათ, სტუდენტისთვის ქირის საფასურის გადახდა მარტივი არ არის და რა თქმა უნდა, ამაში მშობლები მეხმარებიან. თუმცა ბინის დაქირავება ყოველთვიურად იმდენად ძვირია, ძნელია 300-400 ლარიც გიხადონ, დამატებით ყოველდღიური საჭმლის ფულიც გქონდეს და ა.შ. ამიტომ თავიდანვე გადავწყვიტე ბინა სხვა სტუდენტებთან ერთად მექირავა. მეორე კურსიდან ჯგუფებელებმა ბინა ერთად ვიქირავეთ, რაშიც 500 ლარს ვიხდით. 2 პატარა ოთახი გვაქვს ერთი საძინებელი და მისაღები". წაიკითხეთ გაგრძელება