თბილისის აეროპორტში ჯანმრთელობისთვის მავნე ნივთიერების შემცველი სითხის დაღვრის ფაქტზე რუსეთის მოქალაქე დააკავეს
სახელმწიფო უსაფრთხოების სამსახურის კონტრდაზვერვის დეპარტამენტმა რუსეთის მოქალაქე დააკავა. "სახელმწიფო უსაფრთხოების სამსახურის კონტრდაზვერვის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, რუსეთის ფედერაციის მოქალაქე დიმიტრი ბ. ბრალდებულის სახით დააკავეს.
გამოძიებამ დაადგინა, რომ დიმიტრი ბ-მ 2018 წლის 2 ივლისს, თბილისის საერთაშორისო აეროპორტში გაფრენის დარბაზში მდებარე ერთ-ერთი ავიაკომპანიის სალაროს ოფისში ჯანმრთელობისთვის მავნე ნივთიერების შემცველი სითხე დაღვარა.
გამოძიებას აწარმოებს სახელმწიფო უსაფრთხოების სამსახურის კონტრდაზვერვის დეპარტამენტი", – ნათქვამია სახელმწიფო უსაფრთხოების სამსახურის განცხადებაში.
აეროპორტში გაურკვეველი ნივთიერებით მოწამლულმა შვიდივე პაციენტმა "სამედიცინო კორპორაცია ევექსის" რეგიონული ჰოსპიტალი გუშინ რამდენიმესაათიანი მკურნალობის შემდეგ დატოვა. ამის შესახებ "ინტერპრესნიუსს" აღნიშნული კლინიკის გადაუდებელი მედიცინის განყოფილების ხელმძღვანელმა, ექიმმა ტოქსიკოლოგმა, ოთარ დიხამინჯიამ განუცხადა.
მისივე თქმით, რამდენიმესაათიანი გამოკვლევების, დაკვირვებისა და მკურნალობის შემდეგ შვიდივე პაციენტი ბინაზე გაეწერა. ექიმის თქმით, მათ აბულატორიული მეთვალყურეობა დაენიშნათ.
დიხამინჯიას განცხადებით, რა ნივთიერებამ გამოიწვია ინტოქსიკაცია, დაზარალებულებისთვის უცნობია. ექიმი-ტოქსიკოლოგის თქმით, მათ სიცოცხლეს საფრთხე არ ემუქრება. პაციენტებს რამდენიმე დღის შემდეგ გამოკვლევები კიდევ ჩაუტარდებათ.
"შვიდივე პაციენტმა თვითდინებით მომართა ჩვენს კლინიკას ტოქსიკოლოგთან კონსულტაციისთვის. მათგან ორს თვალის ლორწოვანი გარსის ანთება აღენიშნებოდა, ერთს კი თვალის ლორწოვანი გარსის ანთების გარდა, კანზე ჰქონდა ერთი ბუშტუკოვანი გამონაყარი. ასევე, ამ პაციენტებს 2 ივლისს აღენიშნებოდათ თავბრუსხვევა, გულისრევა, თვალის ლორწოვანი გარსის გაღიზიანება. არც ერთის მდგომარეობა არ იყო კრიტიკული და არასტაბილური. შესაბამისად, შვიდივე მათგანი შესაბამისი რეკომენდაციის, გარკვეული გამოკვლევების ჩატარების შემდეგ ბინაზე გავწერე. ისინი ჩემთან მოვიდნენ 4 ივლისს, თუმცა გაურკვეველ ნივთიერებასთან შეხება 2 ივლისს ჰქონდათ", – განაცხადა დიხამინჯიამ.
ამასთან, ინტოქსიკაციით ინგოროყვას კლინიკას მიმართა ერთმა პაციენტმა.
როგორც კლინიკაში განაცხადეს, მამაკაცის მდგომარეობა საშუალო სიმძიმისაა. მას გამოკვლევები ჩაუტარდა და ჯერჯერობით კლინიკაში რჩება.