გორში სტუდენტებმა ზაზა სარალიძის მხარდამჭერი აქცია გამართეს
გორში, სტუდენტებმა ხორავას ქუჩაზე მოკლული დავით სარალიძის მამის, ზაზა სარალიძის მხარდამჭერი აქცია გამართეს. გორის სახელმწიფო სასწავლო უნივერსიტეტის შენობასთან სტუდენტები პლაკატებით შეიკრიბნენ და ობიექტური გამოძიება მოითხოვეს.
უნივერსიტეტთან გამართული აქციის დასრულების შემდეგ, სტუდენტებმა გორის ციხის მიმართულებით საპროტესტო მსვლელობის გადაწყვეტილება მიიღეს, შემდეგ კი შეძახილებით ქალაქის ერთ-ერთ ცენტრალურ, ჭავჭავაძის ქუჩაზე მსვლელობა გამართეს.
აქციის მონაწილეების თქმით, ვიდრე არ მოხდება დავით სარალიძის მკვლელის, ან მკვლელების დაპატიმრება, გარდაცვლილის მამას მხარდაჭერას კვლავ გამოუცხადებენ და აქციებს გამართავენ.