რა კომენტარს აკეთებენ შსს-ში "ფეისბუქის" პროფილის შესახებ, რომელზეც ბავშვების ფოტოებს აზიარებენ
სოციალურ ქსელ "ფეისბუქში" რამდენიმე დღის წინ ქართველმა მომხმარებლებმა არაბული სახელით დარეგისტრირებულ პროფილზე გაზიარებული საქართველოში მცხოვრები მცირეწლოვანი ბავშვების ფოტოები შენიშნეს, ერთ-ერთმა მომხმარებელმა კი შინაგან საქმეთა სამინისტროს მიმართა. ფაქტით შსს გუშინ შეტყობინების მიღების შემდეგ დაინტერესდა.
როგორც უწყების საზოგადოებასთან ურთიერთობის სამსახურში განმარტავენ, შეტყობინება გლდანი-ნაძალადევის პოლიციაში მოქალაქის მიერ შევიდა, რომელმაც პოლიციას აღნიშნული "ფეისბუქის" პროფილით დაინტერესება სთხოვა. უწყებაში განმარტავენ, რომ საკითხთან დაკავშირებით დაიწყო მოკვლევა, თუმცა ბოლო ინფორმაციით დანაშაულის ნიშნები არ იკვეთება და გამოძიება არ დაწყებულა.
"ფეიქბუქში" არსებულ პროფილზე, რომლითაც ძირითადად, ბავშვების ფოტოებია გაზიარებული, მოქალაქეები შინაგან საქმეთა სამინისტროს ნიშნავდნენ და მოუწოდებდნენ, აღნიშნულით დაინტერესებულიყო. "ფეისბუქის" მომხმარებლების ნაწილი კომენტარებში წერდა, რომ აღნიშნული პროფილი, შესაძლოა, პედოფილიის ნიშნებს შეიცავდეს.