კალაძის თქმით, გენგეგმაზე მუშაობა "სითი ინსტიტუტთან" ერთად შესაძლოა აღარ გაგრძელდეს
თბილისის მერის კახა კალაძის განცხადებით, უახლოეს მომავალში გადაწყდება, გენერალური გეგმის პროექტზე მუშაობა "სითი ინსტიტუტთან" ერთად გაგრძელდება თუ არა.
"მომართული ვართ იქითკენ, რომ დოკუმენტი შევიმუშავოთ. როგორ და ვისთან ერთად, ამ გადაწყვეტილებას უახლოეს მომავალში მოგაწვდით",- განაცხადა კახა კალაძემ დღეს პარლამენტში, თბილისის საკრებულოსა და საქართველოს პარლამენტის "ქართული ოცნების" დეპუტატებთან დახურული შეხვედრის დაწყებამდე.
თბილისის მერის ინფორმაციით, ხვალ თავად "სითი ინსტიტუტი" გეგმავს თავისი ხედვები წარმოადგინოს.
"გენგეგმაზე მუშაობის პროცესი დიდი ხანია მიმდინარეობს და უსასრულო ვერ იქნება. მათ ხელშეკრულებით გათვალისწინებული ჰქონდათ 18 თვე, რომ გენერალურ გეგმაზე მუშაობა დაემთავრებინათ, როდესაც ჩვენი გუნდი მოვიდა, 26 თვე იყო გასული. მათ შემდეგ წარმოადგინეს მეექვსე ეტაპის დოკუმენტაცია, რაც დაუხარვეზდათ. ჩვენ განვაცხადეთ, რომ გვინდა ამ დოკუმენტის მიღება, მაგრამ ეს უნდა იყოს გამართული დოკუმენტი, მივმართეთ დაესახელებინათ გონივრული ვადა, რა ვადაშიც შეეძლოთ ამ ყველაფრის გამოსწორება. მათ მოითხოვეს 45 დღე, რაზეც დავეთანხმეთ, თუმცა გამოსწორებული რეალურად არაფერი არ არის", - განაცხადა კახა კალაძემ.