გურჯაანში მცხოვრები ამონაშვილების ოჯახი პოლიციას ზეწოლაში ადანაშაულებს
გურჯაანის მუნიციპალიტეტში მცხოვრები ამონაშვილების ოჯახი პოლიციას ზეწოლაში ადანაშაულებს. ოჯახის ინფორმაციით, გამთენიისას სოფელ კალაურში, მათ საცხოვრებელ სახლში კახეთის პოლიციის დეპარტამენტის წარმომადგენლებმა ჩხრეკა ჩაატარეს.
როგორც მალხაზ ამონაშვილმა "ინტერპრესნიუსთან" საუბრისას განაცხადა , სამართალდამცველების მხრიდან მუდმივად ხდება ზეწოლა და ამ შემთვევაშიც მას და მის ძმას ალექსი ამონაშვილს ქურდობაში დებენ ბრალს, რის გამოც მისი ძმა დაკითხვაზე გადაიყვანეს.
"ყველამ იცის ჩვენ ვინც ვართ, როგორ ვშრომობთ და ვწვალობთ. სრულიად უსაფუძვლოდ მოვარდნენ, 25 -მდე შეიარაღებული პოლიციელი იყო. სპეცრაზმიც იყო მოსული. ისე შემოცვივდნენ თითქოს დამნაშავეები ვყოფილიყავით. მოპარულ ორ ტელევიზორს, იარაღს და ხელთათმანებს ეძებდნენ. ჩემი ძმა დაკითხვაზე წაიყვანეს და რამდენიმე წუთია რაც გამოუშვეს. მე ვფიქრობ, ეს ამბავი წარსულს უკავშირდება, რადგან მამაჩემი "მხედრიონის" წევრი იყო, რის შემდეგაც ჩვენს ოჯახზე მუდმივად ხდება რაღაცის დაბრალება", - განაცხადა მალხაზ ამონაშვილმა.
შინაგან საქმეთა სამინისტროში ამონაშვილების ოჯახზე ზეწოლის ფაქტს არ ადასტურებენ. უწყების ცნობით, ალექსი ამონაშვილი ქურდობის ფაქტზე დაწყებული საგამოძიებო პროცესის ფარგლებში დაკითხეს.