მუსტაფა ემრე ჩაბუქის თურქეთში ექსტრადირების საკითხის განხილვა გადაიდო
დემირელის კოლეჯის მენეჯერის, მუსტაფა ემრე ჩაბუქის თურქეთში ექსტრადირების საკითხის განხილვა 19 თებერვლამდე გადაიდო.
მოსამართლემ გაიზიარა დაცვის მხარის შუამდგომლობა და პროცესი ბრალდების პოზიციის მოსმენის შემდეგ გადადო. დაცვის მხარემ პროკურატურის შუამდგომლობაზე წერილობითი და არგუმენტირებული პოზიციის წარსადგენად სასამართლოს გონივრული ვადა სთხოვა, რაც მოსამართლე არსენ კალატოზიშვილმა დააკმაყოფილა.
გარდა ამისა, მოსამართლემ განმარტა, რომ ამ საქმეზე შემოსულია სახალხო დამცველის, საია-ს თავმჯდომარისა და ადამიანის უფლებების სწავლებისა და მონიტორინგის ცენტრის დირექტორის სასამართლოს მეგობრის პოზიციები, რაც საკმაოდ მოცულობითია და მას დრო სჭირდება, რათა ამ პოზიციებს გაეცნოს.