უეფა-მ, შესაძლოა, ბავშვთა ფეხბურთში თავით ბურთის დარტყმა აკრძალოს
ევროპული ფეხბურთის ასოციაციების კავშირმა (უეფა), შესაძლოა, ბავშვთა ფეხბურთში თავით ბურთის დარტყმა აკრძალოს. ამის შესახებ ორგანიზაციის პრეზიდენტმა ალექსანდერ ჩეფერინმა განაცხადა. მისი თქმით, უეფა განიხილავს ამ საკითხს, თუ დადასტურდება, რომ ბურთისთვის თავით დარტყმა ტვინის მუშაობას არღვევს.
"რა თქმა უნდა, ჩვენ ეს საკითხი ზედმიწევნით უნდა შევისწავლოთ. თუ კვლევა აჩვენებს, რომ ეს ბავშვებისთვის საზიანოა, ჩვენ ამ პრობლემით სრული სერიოზულებით უნდა დავკავდეთ. ეს ძალიან მნიშვნელოვანია.
როდესაც სპორტის სხვა სახეობებს, მაგალითად, კრივს ან შერეულ საბრძოლო ხელოვნებებს უყურებ, ეს შემზარავად გამოიყურება. ეს პრობლემა სპორტის ბევრ სახეობას, მათ შორის ფეხბურთსაც ეხება. მოუთმენლად დაველოდები კვლევის შედეგებს", - განაცხადა ჩეფერინმა.
აღსანიშნავია, რომ 2016 წელს, აშშ-ში 11 წლამდე ასაკის ბავშვებს აუკრძალეს ფეხბურთის თამაშის დროს თავით ბურთის დარტმა.