თბილისში ყველაზე ხშირად სიგარეტის ნამწვის და პოლიეთილენის პარკის გამო დაჯარიმდნენ
"თბილსერვის ჯგუფის" ინფორმაციით, სანქციების ამოქმედების დღიდან - 2017 წლის 20 აპრილიდან დღემდე ქვეითი ინსპექტორების მიერ გარემოს დაბინძურებისთვის 3 940 საჯარიმო ოქმი დაიწერა. შესაბამისი ინფორმაცია "თბილსერვის ჯგუფიდან" kvirispalitra.ge-მ გამოითხოვა. 3 940 სამართალდამრღვევი პირიდან 1338 უცხო ქვეყნის მოქალაქეა. ჯარიმებით შემოსული თანხის ოდენობა ჯამში 387 840 ლარით განისაზღვრა.
როგორც უწყებაში განმარტავენ, თბილისში ბოლო სამი თვის განმავლობაში შედგენილია 1 217 საჯარიმო ოქმი. 1 217 სამართალდამრღვევი პირიდან 1084 ქართველი, 133 კი უცხო ქვეყნის მოქალაქე აღმოჩნდა. ბოლო სამი თვის განმავლობაში ჯარიმებისთვის გადახდილი თანხა 114 000 ლარია. საჯარიმო ოქმები ძირითადად, შედგენილია 2 კგ-მდე მუნიციპალურ ნარჩენზე (მოქალაქეები ყველაზე ხშირად სიგარეტის ნამწვის, პოლიეთილენის პარკის, პოლიეთილენის ბოთლის და მსგავსი ნარჩენების გადაგდებაზე ჯარიმდებოდნენ).
რა დაგემუქრებათ ავტომანქანიდან ნაგვის დაყრის შემთხვევაში
რაც შეეხება 2018 წელს, "თბილსერვის ჯგუფის" ინფორმაციით, დედაქალაქში ნაგვის დაყრის ფაქტზე 1-ელი იანვრიდან დღემდე 116 საჯარიმო ოქმია შედგენილი. დაჯარიმებული პირებიდან 30 უცხო ქვეყნის მოქალაქეა. ამ პერიოდში დაწერილი ჯარიმების თანხის ოდენობამ 11 230 ლარი შეადგინა.
2017 წლის 3 აპრილიდან, დედაქალაქში, "თბილსერვის ჯგუფის" ზედამხედველობის სამსახურის ქვეით ინსპექტორებს, მათზე დაკისრებული უფლებამოსილების ფარგლებში დაევალათ, ფიზიკური და იურიდიული პირები საყოფაცხოვრებო თუ სხვა სახის ნარჩენის დაყრისთვის დაეჯარიმებინათ. პირველი-ორი კვირის განმავლობაში, ინსპექტორების გამოჩენას მხოლოდ ინფორმაციული სახე ჰქონდა, ისინი მოქალაქეებს მომავალ სანქციებთან დაკავშირებით აფრთხილებენ და მათ მიერ დაყრილი ნარჩენის ურნაში ჩაყრისკენ მოუწოდებდნენ. 20 აპრილს კი, გამკაცრებული სანქციები ამოქმედდა.