მწერალი დავით ტურაშვილი კულტურის სამინისტროდან "ნიუ ჰოსპიტალში" გადაიყვანეს
მწერალი დავით ტურაშვილი კულტურის სამინისტროდან სასწრაფო დახმარების მანქანით "ნიუ ჰოსპიტალში" გადაიყვანეს. როგორც "ინტერპრესნიუსს" კულტურის სამინისტროში განუცხადეს, დავით ტურაშვილი შინაგან საქმეთა მინისტრთან მწერლების შეხვედრაზე შეუძლოდ გახდა. მას სასწრაფო დახმარების ექიმებმა პირველადი დახმარება ადგილზე აღმოუჩინეს, ის თავს უკეთ გრძნობს, თუმცა, მედიკოსებმა საავადმყოფოში მისი გადაყვანა მაინც საჭიროდ ჩათვალეს.
კულტურისა და სპორტის მინისტრი მიხეილ გიორგაძე დღეს, 2018 წლის ფრანკფურტის წიგნის ბაზრობის საკითხთან დაკავშირებით სამინისტროში მწერლებსა და მთარგმნელებს ხვდებოდა. მოგვიანებით შეხვედრას შინაგან საქმეთა მინისტრი გიორგი გახარიაც შეუერთდა, სადაც საუბარი პოეტ ზვიად რატიანთან დაკავშირებულ შემთხვევაზე გაგრძელდა. მოულოდნელად მწერალი დავით ტურაშვილი შეუძლოდ გახდა და სასწრაფო დახმარების გამოძახება გახდა საჭირო.