სპეცოპერაციისას დაჭრილი სამი სამართალდამცველის ჯანმრთელობის მდგომარეობა სტაბილურია
სპეცოპერაციის დროს დაჭრილი 3 სამართალდამცველის ჯანმრთელობის მდგომარეობა სტაბილურია. როგორც თბილისის რეფერალური ჰოსპიტალის ქირურგიული სამსახურის უფროსმა იოსებ აბულაშვილმა განაცხადა, პაციენტების მდგომარეობა საშუალო სიმძიმისაა და ისინი იმყოფებიან სტაციონალურ მკურნალობაზე.
ექიმის თქმით, სამივე პირს ჭრილობები აღენიშნებოდათ ქვედა და ზედა კიდურებზე და მათ ჩაუტარდათ ქირურგიული ოპერაციები.
"გუშინ საღამოს ჩატარებული სპეცოპერაციის შემდეგ რეფერალურ ჰოსპიტალში შემოვიდა სამი ადამიანი, რომელთაც აღენიშნებოდათ მრავლობითი ჭრილობები, ძირითადად, ქვედა და ზედა კიდურების არეში. სამივე პაციენტს გაეწია ქირურგიული კვალიფიციური მომსახურეობა, ჩაუტარდათ ოპერაციები. ამჟამად, მათი მდგომარეობა სტაბილურია, საშუალო სიმძიმის, იმყოფებიან ქირურგიულ დეპარტამენტში სტაციონალურ მკურნალობაზე", - განაცხადა აბულაშვილმა.