ავარია ქედაში - დაშავებული 7 ბავშვიდან ერთ-ერთს თავის არეში ოპერაცია ჩაუტარდა
ქედაში ავტოსაგზაო შემთხვევის შედეგად დაშავებულ ერთ მოზარდს გვიან ღამით, ბათუმის დედათა და ბავშვთა საავადმყოფოში თავის არეში ოპერაცია ჩაუტარდა. კიდევ ორი ბავშვი ექიმების მეთვალყურეობის ქვეშ რჩება.
როგორც "ინტერპრესნიუსთან" საუბრისას აჭარის ჯანმრთელობისა და სოციალური დაცვის მინისტრის პირველმა მოადგილემ ლელა სურმანიძემ განაცხადა, ბავშვების ჯანმრთელობის მდგომარეობა სტაბილურია. მისივე ინფორმაციით, ოთხმა დაშავებულმა საავადმყოფო უკვე დატოვა. მათ მნიშვნელოვანი დაზიანებები არ აღენიშნებოდათ.
არსებული ინფორმაციით, გუშინ ქედის ცენტრალურ საავტომობილო გზაზე მოძრავ მიკროავტობუსში მსხდომმა ბავშვებმა კარი გააღეს და გადმოვარდნენ.
ქედაში დაშავებულ ბავშვებს პირველადი სამედიცინო დახმარება ქედის სამედიცინო ცენტრში გაუწიეს. მოგვიანებით კი ბავშვები ბათუმის დედათა და ბავშვთა საავადმყოფოში გადაიყვანეს.
როგორც "ინტერპრესნიუსს" საქართველოს შინაგან საქმეთა სამინისტროში განუცხადეს, მომხდარზე გამოძიება სსკ-ის 276-ე მუხლით დაიწყო, რაც სატრანსპორტო მოძრაობისას წესების დარღვევას გულისხმობს.