"ოკრიბას" ავტოსადგურის მიმდებარე ტერიტორიაზე გაუჩინარებული მამაკაცი პოლიციამ ურეკში იპოვა
"ოკრიბას" ავტოსადგურის მიმდებარე ტერიტორიაზე გაუჩინარებული ლევან მ. პოლიციამ ურეკში იპოვა. როგორც "ინტერპრესნიუსს" შს სამინისტროდან აცნობეს, შსს-ს თბილისის პოლიციის დეპარტამენტის დიდუბე-ჩუღურეთის სამმართველოს მე-2 განყოფილებაში, ქუთაისის საქალაქო სამმართველოდან გადაგზავნილი მასალების საფუძველზე, 1995 წელს დაბადებული ლ. მ.-ს დიდუბის ავტოსადგურ "ოკრიბადან" გაუჩინარების ფაქტის შესახებ გამოძიება საქართველოს სსკ-ს 143-ე მუხლის 1-ელი ნაწილით დაიწყო, რაც თავისუფლების უკანონოდ აღკვეთას გულისხმობს.
უწყების ინფორმაციით, სამართალდამცველებმა, ჩატარებული ოპერატიულ-სამძებრო ღონისძიებების შედეგად, მოქალაქე ლ.მ.-ს ადგილსამყოფელი დაადგინეს. გაირკვა, რომ იგი სოფელ გრიგოლეთიდან დაბა ურეკის მიმართულებით გადაადგილდებოდა. ამ მომენტისათვის ლ.მ. თავს კარგად გრძნობს. მის მიმართ რაიმე სახის ძალადობრივ ქცევას ან თავისუფლების უკანონო აღკვეთას ადგილი არ ჰქონია.