ინდოეთის მოქალაქე საქართველოს აეროპორტის პერსონალს რასიზმში ადანაშაულებს
ინდოეთის მოქალაქე ხუშბუ კაუშალი "ფეისბუქში" ვრცელ პოსტს აქვეყნებს, რომლითაც ინდოეთში საქართველოს ელჩს, არჩილ ძულიაშვილს მიმართავს. ინდოელი გოგონა წერს, რომ მას თბილისის აეროპორტის თანამშრომლები რასისტულად მოექცნენ - 6 საათით გამოკეტეს საჭმლის, წყლის და ყოველგვარი ახსნა-განმარტების გარეშე:
"მე ინდოეთის მოქალაქე ვარ, მარტოხელა ქალი, რომელიც სარეკლამო სააგენტოში მუშაობს. გადავწყვიტე შვებულება საქართველოში გამეტარებინა, რადგან ქვეყნის ისტორია ჩემთვის საკმაოდ მომხიბლავი იყო. 29 ივნისს, დილის ხუთ საათზე მუმბაიდან გამოვფრინდი და თბილისის დროით საღამოს ხუთზე ჩამოვფრინდი. თან მქონდა ელექტრონული ვიზა საბანკო ამონაწერი ფინანსური სტაბილურობის დასადასტურებლად, სასტუმროს ჯავშანი, დაზღვევა და დამსაქმებლის წერილი, სადაც ეწერა, რომ შვებულების გასატარებლად ვიყავი ჩამოსული და უკან უნდა დავბრუნებულიყავი.
პასპორტის შემოწმებისას ჩემდა გასაკვირად მთხოვეს, რომ მოუნიშნავ სალაროსთან გადავსულიყავი, რათა ჩემი საბუთები შეემოწმებინათ. ნახევარსაათიანი ლოდინის შემდეგ, ერთ-ერთმა ოფიცერმა დამიწყო გამოკითხვა ჩემი ვიზიტის მიზნებთან დაკავშირებით. შემდეგ კიდევ ორი საათი დამტოვეს მოლოდინის რეჟიმში ცივ, ემიგრანტებისთვის განკუთვნილ რკინის არაკომფორტულ სკამზე. თბილისში უკვე სამი საათის ჩამოსული ვიყავი და არანაირი ინფორმაცია არ მქონდა, რატომ მაკავებდნენ აეროპორტში, გადავწყვიტე ჩემი სტატუსი გამერკვია და ამ დროს მითხრეს, რომ უკან მგზავნიდნენ. როდესაც მიზეზი ვიკითხე, დამიყვირეს და მითხრეს კუთხეში დავმჯდარიყავი.
ეს იყო ყველაზე დამამაცირებელი ღამის დასაწყისი ჩემს ცხოვრებაში
ყოველ ჯერზე, როდესაც თქვენ ემიგრაციის ოფიცერთან კითხვით მივდიოდი, პასუხად ყვირილს ვიღებდი და უხეშად მეუბნებოდნენ, რომ კუთხეში ვმჯდარიყავი. არ ვიცი რაში იყო ჩემი ბრალეულობა, ყველაზე ცუდი ის იყო, რომ მარტო ვიყავი და ვხვდებოდი, რომ მოვტყუვდი იმ ინფორმაციით, თითქოს თქვენ ქვეყანაში მეგობრული ხალხია.
ექვსსაათიანი ლოდინის შემდეგ, არც წყალი შემომთავაზეს. არ მითხოვია, ვემუდარებოდი. მშიოდა, მწყუროდა, თავი და სხეული მტკიოდა. როგორც იქნა, ღამის თორმეტ საათზე მომცეს ნებართვა საჭმელი მეყიდა. ორსაათნახევრის შემდეგ, ერთ-ერთი თქვენი ოფიცერი მოვიდა ემიგრაციის ოთახში და ყვირილი დამიწყო რომ ახლავე უნდა წავსულიყავი, რადგან თვითმფრინავი, რომლითაც უკან მგზავნიდნენ, მზად იყო ასაფრენად. როდესაც პასპორტის დაბრუნება ვითხოვე, მითხრეს რომ სანამ მუმბაიში არ ჩავიდოდი, არ გადმომცემდნენ.
ცხრა საათი, რომელიც თქვენ ქვეყანაში გავატარე, ყველაზე საშიში და ცუდი საათები იყო ჩემ ცხოვრებაში.
უკან დაბრუნებული დავინტერესდი, რა მიზეზით გამომაბრუნეს. ინდოეთის საემიგრაციო სამსახურში მითხრეს, რომ არასწორი ინფორმაცია მივაწოდე საკუთარ თავზე. მაინტერესებს, რის საფუძველზე გადაწყვიტა ეს იმ ადამიანმა, ვისთანაც მქონდა გასაუბრება? ყველა ჩემი საბუთი წესრიგში იყო. ინდოეთის ავიახაზებთან ჩემმა მეგობრებმა გადაამოწმეს და იქ უთხრეს, რომ ჩემი პასპორტი იყო დაზიანებული და სავარაუდოდ, გაყალბებული. არცერთ ქვეყანაში, სადაც მიმგზავრია პრობლემა არ შემქმნია და რაღა თქვენი ქვეყნისთვის აღმოჩნდა ჩემი პასპორტი პრობლემა?!
შემდეგ ინდოეთის ემიგრაციის ოფიცრებმა მითხრეს, რომ თქვენთან 90%-ს ინდოელების, უკან აბრუნებენ, იქნება ეს ოჯახები თუ ჩემსავით კენტად მოგზაურები. დამაინტერესა რა იყო ამის მიზეზი, რადგან 2015 წელს საქართველოში ტურიზმის 80% ინდურმა სექტორმა შეადგინა და თქვენ ქვეყანას კარგი ეკონომიკური ბიძგი მისცა.
აღმოვაჩინე, რომ საქართველოს მთავრობას მოუწვევია ინდოელი ფერმერები მიწების დასამუშვებლად, რომელზეც ქართველები ვერ მუშაობდნენ. ამ ინდოელების შემოდინებამ გაზარდა ზიზღი მათ მიმართ, რაც როგორც ჩანს, აისახა ემიგრაციის ოფიცრებზე, რომლებიც რასისტულად არიან განწყობილები ინდოელი ტურისტებისადმი.
მინდა გითხრათ, რომ თქვენი ქვეყანა უდიდესი იმედგაცრუება აღმოჩნდა.
მთელი ჩემი მღელვარება გამომეკვლია თქვენი მიწა, გაქრა. ჯობდა საკუთარი დრო და ფული სხვა, მართლა მეგობრულ ქვეყანაში დამებანდებინა, სადაც ტურიზმს აფასებენ. ასევე მინდა გთხოვოთ, რომ თქვენი მოქალაქეების მოლოდინები დაარეგულიროთ, რომ რასისტებად არ გადაიქცნენ სხვა ქვეყნის მოქალაქეების მიმართ. და საუკეთესო რაც შეიძლება გააკეთოთ იმ ხალხისთვის, ვინც ჩემსავით დეპორტირდება, ისაა, რომ ადამიანებივით მოეპყროთ.
აუხსნენით მიზეზი, მიეცით საკვები, წყალი და დასასვენებელი ადგილი. არავინ იმსახურებს ისეთ მოპყრობას, როგორც მე მომექცნენ. გისურვებთ ყველაფერ საუკეთესოს და იმედი მაქვს ჩემს ქვეყანაში სტუმრობით ნასიამოვნები დარჩებით. პატივისცემით, ხუშბუ კაუშალი".
გოგონას პოსტთან დაკავშირებით განცხადება გამოაქვეყნა შინაგან საქმეთა სამინისტრომაც. Allnews.ge ტექსტს უცვლელად გთავაზობთ:
"საქართველოში ტურისტებისა და სხვა ვიზიტორების მზარდი რაოდენობის პარალელურად, ბუნებრივია, არის ცალკეული შემთხვევები, როდესაც უცხო ქვეყნის მოქალაქეს, კანონით გათვალისწინებული პროცედურებისა და საერთაშორისო სტანდარტების შესაბამისად, უარი ეთქმევა ქვეყანაში შემოსვლაზე.
უცხო ქვეყნის მოქალაქეების მიერ საქართველოს საზღვრის კვეთის პროცედურები განსაკუთრებულად კონტროლდება ვიზალიბერალიზაციის ამოქმედების შემდეგ.
საყურადღებოა ის ფაქტი, რომ 2017 წლის ივნისში საქართველოს სახელმწიფო საზღვარი ინდოეთის 6517 მოქალაქემ გადმოკვეთა.
აქვე განვმარტავთ, რომ საქართველოს სახელმწიფო საზღვრის კვეთისას, მესაზღვრე-კონტროლიორს გააჩნია კანონით მინიჭებული უფლება, უარი უთხრას უცხო ქვეყნის მოქალაქეს საქართველოში შემოსვლაზე, როდესაც მოქალაქე არ იძლევა დამაჯერებელ პასუხებს ინტერვიურების დროს ან უფლებამოსილ პირს აძლევს ყალბ ინფორმაციას მგზავრობის მიზნის შესახებ.
სასაზღვრო-გამტარ პუნქტებში მოქალაქეების შემოწმება ხდება მსოფლიოში დამკვიდრებული, საყოველთაოდ აღიარებული მეთოდების გამოყენებით. იგივე პროცედურები უტარდებათ საქართველოს მოქალაქეებს სხვა ქვეყნების საზღვრების კვეთის დროს.
გასათვალისწინებელია ის ფაქტიც, რომ მიმდინარე წლის ივნისის თვეში, გასული წლის ანალოგიურ პერიოდთან შედარებით, საქართველოში შემოსული ტურისტების რაოდენობის უპრეცედენტო მაჩვენებელი - 43%-იანი ზრდა დაფიქსირდა", - ნათქვამია განცხადებაში.