მშენებელს შესაძლოა, გამწვანების ვალდებულება დაეკისროს
"ვმუშაობთ კანონპროექტზე, რომლის მიხედვითაც მშენებელს გამწვანების ვალდებულება დაეკისრება, წინააღმდეგ შემთხვევაში, შენობა ექსპლუატაციაში ვერ შევა," - ამის შესახებ Allnews.ge-ს თბილისის მერიის გამწვანების სამსახურის იურისტმა, ლიკა ჭაჭუკაშვილმა განუცხადა.
მისი თქმით, ამ ეტაპზე კანონი მშენებელს ობიექტზე გამწვანებისთვის ფართობის გამოყოფას სთხოვს, თუმცა მცენარების დარგვას არ ავალდებულებს. ახალი კანონის მიხედვით კი, საცხოვრებელი კორპუსისა თუ სხვა შენობის ტერიტორიის გამწვანება სავალდებულო იქნება.
ლიკა ჭაჭუკაშვილის განმარტებით, რეგულაციაზე მუშაობა ჯერჯერობით შიდა უწყებებში მიმდინარეობს, ცვლილების განსახორციელებლად კი მთავრობის დადგენილებაა საჭირო.
"როდის შევა საკანონმდებლო ინიციატივა ძალაში ჯერჯერობით უცნობია, ეს უკვე საქართველოს მთავრობის გადაწყვეტილებაზე დამოკიდებული," - დასძენს ის.
გამწვანების სამსახურში ასევე აღნიშნავენ, რომ მერიისთვის მნიშვნელოვანია, რეგულაციები ძალაში მიმდინარე წელს შევიდეს.