რუსთავში მამაკაცმა პნევმატური იარაღით ერთი ლეკვი მოკლა და ერთი დაჭრა
რუსთავში ცხოველისადმი სასტიკი მოპყრობის მორიგი ფაქტი დაფიქსირდა. ბალანჩივაძის ქუჩაზე ახალგაზრდა მამაკაცმა პნევმატური იარაღიდან გასროლით ერთი ლეკვი მოკლა, მეორე კი დაჭრა. ფაქტთან დაკავშირებით ბალანჩივაძის ქუჩის მცხოვრებლებმა პოლიციასა და ცხოველთა უფლებების დამცველ არასამთავრობო ორგანიზაციებს შეატყობინეს და მამაკაცის კანონის ფარგლებში დასჯა მოითხოვეს.
როგორც "ინტერპრესნიუსთან" საუბარში ორგანიზაცია "ცხოველთა მეგობრების" წარმომადგენელმა ირინა ლიკლიკაძემ განაცხადა, ბალანჩივაძის ქუჩაზე მომხდარ ფაქტთან დაკავშირებით, პოლიციაში წუხელ გამოიკითხნენ თვითმხილველები, დილიდან კი ძაღლის მიმკედლებელი პირის გამოკითხვა მიმდინარეობს.
დაჭრილ ლეკვი წუხელ მიიყვანეს ვეტერინართან და მას შესაბამისი სამედიცინო დახმარება აღმოუჩინეს.
როგორც "ინტერპრესნიუსს" შსს-ში განუცხადეს, ცხოველისადმი სასტიკი მოპყრობის ფაქტზე, სისხლის სამართლის საქმე 259 -ე მუხლით აღიძრა და მიმდინარეობს გამოძიება. ბოლო ერთი თვის განმავლობაში, რუსთავში ცხოველის მიმართ სასტიკი მოპყრობის მესამე შემთხვევა დაფიქსირდა.