ძლიერმა შტორმმა ქობულეთის სანაპირო ზოლი დააზიანა | Allnews.Ge

ძლიერმა შტორმმა ქობულეთის სანაპირო ზოლი დააზიანა

წუხანდელმა ძლიერმა შტორმმა ქობულეთის სანაპირო ზოლი დააზიანა. როგორც ქობულეთის გამგებელმა სულხან ევგენიძემ განაცხადა, ამ დროისთვის ქობულეთში შტორმი აღარ ფიქსირდება და სიწყნარეა, თუმცა, სანაპირო ზოლს სერიოზული დაზიანება მიადგა.

"დაზიანებულია სანაპირო ზოლი, სკამები. ახლა გავდივართ შესაბამის სამსახურებთან ერთად, რომ ავიღოთ დაზიანებული სკამები. შემდეგ ტექნიკა დაგვჭირდება, რადგან ქვიშით დაფარული მწვანე საფარი გასაწმენდია", - აღნიშნა გამგებელმა.

რაც შეეხება ელექტროენერგიას, მისი განმარტებით, ძლიერი ქარის შედეგად ქობულეთის მიმდებარე სოფლებში საერთო ჯამში 50 ოჯახია ელექტროენერგიის გარეშე დარჩენილი, თუმცა მათ ელექტრომომარგება დღესვე აღუდგებათ.

ქობულეთში, სანაპირო ზოლზე წუხელ 3-4 ბალიანი შტორმი დაფიქსირდა. წყალმა დატბორა და დააზიანა სანაპირო ზოლზე არსებული ურნები და სკამები.

მიყენებული ზარალის ოდენობაზე გამგეობაში ჯერჯერობით ვერ საუბრობენ.

myquiz