როგორ უნდა მოიქცეთ თუ ბავშვი ხალხმრავალ ადგილას დაგეკარგათ - 3 დაუყოვნებელი ნაბიჯი: პარამედიკოსი გვირჩევს
როგორ უნდა მოიქცეთ თუ ბავშვი ხალხმრავალ ადგილას დაგეკარგათ და დრო თქვენს წინააღმდეგ მუშაობს?
ყოფილმა პარამედიკოსმა, მშობელთა პირველადი დახმარების საგანმანათლებლო პროგრამის - Tiny Hearts Education-ის დამფუძნებელმა, ნიკი ჯურკუცმა, ამის შესახებ ინსტრუქცია გამოაქვეყნა.
აღნიშნული შემთხვევები აშშ-სა და ევროპაში მრავლად არის. ზოგიერთი ქვეყანა 16 წლამდე ბავშვის გარეთ მარტო გასვლას კრძალავს კიდეც. მართალია, მცირეწლოვანთა გატაცება და დაკარგვა საქართველოში აქტუალური არ არის, თუმცა, შემთხვევისგან არავინაა დაზღვეული და ამიტომ სასურველია ვიცოდეთ ყველაზე მნიშვნელოვანი ნაბიჯები, რაც ბავშვის დროულად პოვნაში დაგვეხმარება.
პარამედიკოსის თქმით, თუ თქვენთან მყოფი მცირეწლოვანი ვერ შენიშნეთ, პანიკურ მდგომარეობაში ჩუმად სირბილი და ძებნა, დროის კარგვაა.
ნიკი ჯურკუცი გვიზიარებს ქმედებებს, რომელიც წამებში უნდა განახორციელოთ:
- ხმამაღლა დაიწყეთ ყვირილი რომ ბავშვი დაიკარგა და ყველას დახმარება გჭირდებათ
- ხმამაღლა აღწერეთ ბავშვის გარეგნობა - რა ფერის თმა აქვს, თვალის ფერი, რამდენი წლის არის, სიმაღლეში რამხელაა და ა.შ.
- ხმამაღლა იყვირეთ თუ რა აცვია ბავშვს - რა ფერის მაისური, ქურთუკი, შარვალია და ა.შ.
- ამასთან, ვინმეს სთხოვეთ პოლიციაში დარეკვა, ან პარალელურად თავად დარეკეთ!
როგორც პარამედიკოსი აღნიშნავს, პირადად მას უნახავს ისეთი შემთხვევები, როდესაც მშობელს ერიდება პანიკის ატეხას და მცირეწლოვანს ხშირად ან ძალიან გვიან, ან ადგილიდან მოშორებით, შემთხვევით პოულობენ.
ხოლო, იმ შემთხვევაში თუ ბოროტმოქმედმა გაიტაცა ბავშვი, საზოგადოების ჩართულობა, პანიკა და ხმაური შეაშინებს და დიდი შანსია, რომ არასრულწლოვანი ქუჩაში მიატოვოს.
“ასეთ დროს ყოველი წამი მნიშვნელოვანია. გპირდებით, თუ დაიწყებთ ყვირილს, რომ შვილი დაკარგეთ, ყველა გარშემომყოფი შეეცდება დაგეხმაროთ,“ - აღნიშნავს ნიკი თავის ვიდეოში.
ამასთან, ეცადეთ შეინარჩუნოთ სიმშვიდე და დეტალების გასახსენებლად გონება მოიკრიბოთ.