ვინ არიან და რას ჰყვებიან წარსულსა და ამჟამინდელ ცხოვრებაზე ვაჟა-ფშაველას დევნილი შთამომავლები- "იყო დრო, ვაჟას ეზოში შესვლის უფლება არ გვქონდა"
“ვაჟა-ფშაველაც რომ ცოცხალი იყოს, მასაც კი დავხვრეტდითო“, - ასეთი პასუხი გასცა ბოლშევიკურმა ხელისუფლებამ ქართველი პოეტების დელეგაციას, როდესაც ლევან რაზიკაშვილის შეწყალება ითხოვეს. ლევან რაზიკაშვილი, ვაჟა-ფშაველას უფროსი ვაჟი, ქაქუცა ჩოლოყაშვილის მეგობარი და თანამოაზრე, ბოლშევიკებმა 1923 წლის თებერვალში დახვრიტეს, ქაქუცა ჩოლოყაშვილის რაზმთან თანამშრომლობისა და დახმარებისთვის.
მისი დახვრეტის შემდეგ, ჩარგლიდან, მამისეული სახლიდან გამოყარეს მისი ცოლ-შვილი, დააპატიმრეს მისი სახელი და ხსოვნა! მისი შვილები, ხალხის მტრის შვილების სახელით იზრდებოდნენ და საკუთარი გვარის ხსენებისაც კი ეშინოდათ! ასე იყო მანამ, ვიდრე ვაჟა-ფშაველას 100 წლის იუბილეზე, მწერალთა კავშირის თავმჯდომარეს, ერთი სანდომიანი ქალბატონი არ გამოეცხადა და განაცხადა, - ლევან რაზიკაშვილი ქალიშვილი ვარ, იუბილეზე მოსაწვევი მეც მეკუთვნისო... ათეული წლების დაფარული ამბები ვაჟას ოჯახზე ასე გახდა ცნობილი ქართული ლიტერატურული ელიტისთვის, ხოლო საზოგადოებამ ლევანის ოჯახის არსებობა გასული საუკუნი 90-იანი წლების დასაწყისიდან გაიგო...
დღეს, ლევან რაზიკაშვილის შვილიშვილები გორში ცხოვრობენ, გულით ატარებენ იმ საშინელი ათწლეულების თავგადასავალებს და ტკივილებს, როცა მათ არსებობას და ცხოვრებას შავი ყორანივით თან სდევდა შიში და დავიწყების ტკივილი.
ambebi.ge-ს სტუმრები, ლევან რაზიკაშვილის შვილიშვილები, ძმები - ლევან და გოდერძი გოდერძიშვილები და დები - თამარ და ნინო რაზიკაშვილები არიან, რომლებსაც მათი ბებოსგან, ლევანის მეუღლისგან, თამარ მთვარელიძისაგან უამრავი რამ აქვთ მოსმენილი და მოსაყოლი საზოგადოებისთვის.
ლევან გოდერძიშვილი, ვაჟა-ფშაველას შვილთაშვილი, ლევან რაზიკაშვილის შვილიშვილი:
- მე გახლავართ, ლევან რაზიკაშვილის, ვაჟა-ფშაველას შვილის - ვაჟის შვილიშვილი. როგორც ვიცი, ვაჟას ძალიან უყვარდა პაპაჩემი... ლევანი გორში პირველად, მისმა ბიძამ თედომ ჩამოიყვანა, რომელიც იმ დროს მისდევდა მეფუტკრეობას. იქვე ახლოს, მეფუტკრეობას მისდევდა ლევან მთვარელიძეც, ლევანის სიმამრი. სწორედ იქ გაიცნო ლევანმა მომავალი მეუღლე თამარ მთვარელიძე. მაშინვე მოეწონათ ერთმანეთი და ძალიან მალე იქორწინეს. იმ პერიოდში ლევანი გორში მსახურობდა. ამ დროს ვაჟა საავადმყოფოში იწვა და მასთან ჩასულ ლევანს სთხოვა, - შვილო, იმ კარ-მიდამოს ნუ მიატოვებ, იქაა შენი ფუძეო“. შეისმინა ეს ლევანიმ და ვაჟას გარდაცვალების შემდეგ, მოკიდა ცოლ-შვილს ხელი და გადავიდა საცხოვრებლად ჩარგალში.
ლევან გოდერძიშვილი
1921 წელს მოხდა აჯანყება მთელი საქართველოს მასშტაბით. ეროვნულმა გმირმა, ქაქუცა ჩოლოყაშვილმა შეკრიბა რაზმი და წამოვიდა თავისი შეფიცულებით ჩარგლისაკენ. ამ დროს პაპაჩემი მსახურობდა იქ მილიციის უფროსად ფშავლების თხოვნით.
გოდერძი გოდერძიშვილი, ლევან რაზიკაშვილის შვილიშვილი:
- ძალიან დიდი ავტორიტეტი ჰქონდა პაპას. სამართლიანი კაცი იყო და მფარველი ყველასი. ყველამ ვიცით, რომ ქაქუცას მეგობარი იყო ლევანი და როდესაც პაპას მისი დაჭერის ბრძანება მიუღია, ასეთ ხერხს მიმართა: წაიყვანა 10 კაცი არაგვის გაღმა, სადაც ქაქუცა იყო დაბანაკებული და სანამ მიუახლოვდებოდა, შეუთვალა, გამეცალე აქედან, ბრძანება მივიღეო.. ქაქუცა ამდგარა, ერთი ბატკანი წამოუყვანია პაპასთან შესახვედრად და კარგადაც უქეიფიათ და დამშვიდოებისას თავის თეთრი ნაბადიც კი აჩუქა, რომელიც შიგნიდან ამოტვიფრული იყო ინიციალებით: ქ და ჩ. როგორც ჩანს, ამ 10 კაციდან აღმოჩნდა ერთ-ერთი, ვინც ეს ამბავი გარეთ გამოიტანა. განაგრძეთ კითხვა