"დედამ განვადებით გამოტანილი ტელეფონი გაყიდა და აქ ამ ფულით წამოვედი" - როგორ გახდნენ ქართველი ძმები ესპანეთის სამეფო ოჯახის ფიტნესინსტრუქტორები?
ირაკლიმ არც რჩევები დაიზარა იმის შესახებ, თუ როგორ დავიკლოთ წონაში და ექსკლუზიურად ჩვენი მკითხველისთვის გაიხსენა ესპანეთში გატარებული ყველაზე რთული დღეები, რატომ იჯდა ციხეში, ვინ შეიფარა და გაუწია დედობა, ვინ იყო გოგონა, რომელმაც დახმარების ხელი გაუწოდა და რატომ ვერ შეძლო მან ექვსი წელი ოჯახის ნახვა.
- როგორც ვიცი, საქართველოში გქონდათ კარიერა. რა გახდა ქვეყნის დატოვების მიზეზი?
- ფეხბურთელი ვიყავი, ძალიან მიყვარდა სპორტის ეს სახეობა. ვოცნებობდი დიდი ფეხბურთელი გავმხდარიყავი. 19 წლის ასაკში გადავწყვიტე ესპანეთში ჩამოსვლა, ვფიქრობდი, შრომა აქ უფრო დამიფასდებოდა და ოცნებებსაც ავისრულებდი. მიუხედავად იმისა, რომ ესპანეთში მხოლოდ ერთი ნაცნობი მყავდა და ისიც მაფრთხილებდა, არ ჩამოხვიდეო, მაინც გავრისკე. მამა ამბობდა, - თუ წახვალ, ჩემი შვილი აღარ იქნებიო, მაგრამ უნდა წავსულიყავი და ოჯახს დავხმარებოდი.
ირაკლი თორელი დედასთან ერთად
- 200 დოლარით და არავის იმედად რომ წამოხვედით, არ გეშინოდათ?
- წამითაც არ შემშინებია. ყოველთვის ვაღწევ იმას, რასაც მიზნად დავისახავ. დედამ განვადებით გამოტანილი ტელეფონი გაყიდა და ამ ფულით წამოვედი. ბარსელონაში თურქეთიდან ჩავფრინდი. ერთმა ქართველმა ბიჭმა შემიფარა იმ ღამით და მეორე დღეს გამაცილა სადგურიდან ქალაქში, სადაც ჩემი ახლობელი ცხოვრობდა. იყო მარტივი ცხოვრების შემოთავაზება - ქურდობა, მაგრამ ამაზე არც მიფიქრია. მამა პოლიციაში მუშაობდა და ისე გაგვზარდა, ქუჩაში დაგდებულ ნივთსაც არ ვიღებდით იმის შიშით. სკოლაში ნიშნებს იმიტომ გვიწერდნენ, რომ კარგი აღზრდილები ვიყავით მე და გიგი (იცინის).
- ბევრს შრომობდით, წარმატებული ფეხბურთელი რომ ყოფილიყავით. რატომ თქვით უარი ფეხბურთელის კარიერაზე?
- ვიყავი მეკარე და ერთ-ერთი ვარჯიშის დროს ფეხის სერიოზული ტრავმა მივიღე. იმდენად სერიოზული, რომ დაახლოებით ერთი წელი არ შეიძლებოდა ფეხბურთის თამაში და ამ ხნის მანძილზე მხოლოდ ფიტნესით ვიყავი დაკავებული, ეს მეხმარებოდა სტრესის დაძლევაში, მორალურად მაძლიერებდა. შემდეგ ამ სფეროს უფრო სიღრმისეულად შესწავლა დავიწყე (დედა მთელი ცხოვრება ფიტნესით იყო დაკავებული). გავიარე ფიტნესინსტრუქტორის კურსები, ვისწავლე ყველაფერი სწორი კვების შესახებ, ასევე გავიარე მასაჟის კურსები და ფოტოგრაფიაც შევისწავლე.
- საინტერესოა, რატომ აირჩიეთ ესპანეთი?
- დედას მსოფლიოს თითქმის ყველა ქვეყანა ჰქონდა მოვლილი, ესპანეთის გარდა და ყოველთვის უნდოდა ესპანეთში მოგზაურობა, აქაური ნაციონალური სამოსის ჩაცმა. თმა ყოველთვის გადაწეული ჰქონდა და თმაში ყვავილს ატარებდა... მინდოდა, მისთვის ეს ოცნება ამესრულებინა და ამისთვის ყველაფერი ავიტანე, მეტსაც ავიტანდი.
- ვინ იყო ადამიანი, ვინც გაჭირვების ჟამს მხარში ამოგიდგათ და შვილად მიგიღოთ?
- როდესაც მეგობარმა სასტუმროში მიმიყვანა, სასტუმროს მეპატრონე გავიცანი. ეს პატარა სასტუმრო ცოლ-ქმარს ეკუთვნოდა. ქმარი ესპანელი იყო, ცოლი - შავკანიანი. ყოველდღე ვეხმარებოდი დალაგებაში, მითხრა, რომ ძალიან ვუყვარდი და სურდა, თეთრკანიანი შვილი ჰყოლოდა... ის "შვილს" მეძახდა, მე კი - "დედას"... მართლა ბევრი რთული დღე გადამატანინა, შრომის ანაზღაურებას დღეში 10 ევროს მიხდიდა.
- ხელმოკლე ოჯახში გაიზარდეთ და ფიზიკური შრომით შეგროვებული ფულით ესპანეთში შეძელით წასვლა. გახდა თუ არა ეს თქვენი წარმატების ერთ-ერთი მიზეზი?
- სიმართლე გითხრათ, გაჭირვებაში არ გავზრდილვართ, საკმაოდ ძლიერი ოჯახი გვქონდა, მაგრამ ისე მოხდა, რომ ერთხანს გაგვიჭირდა და ცუდ დღეში ჩავცვივდით. ამიტომ გადავწყვიტე, ოჯახს დავხმარებოდი და მშობლების წინააღმდეგობის მიუხედავად, ჩემი გავიტანე.
- შეჯიბრებებში ყოველთვის ესპანეთის სახელით მონაწილეობთ. იციან თუ არა, რომელი ქვეყნიდან ხართ?
- ყოველთვის თან მქონდა საქართველოს დროშა და ყველას ვუყვებოდი ჩვენი პატარა ქვეყნის შესახებ. ვამაყობ, რომ ქართველი ვარ.