"ეს მხოლოდ დასაწყისია..." - მამუკა მამულაშვილი რუსეთის ტერიტორიაზე სპეცოპერაციების გაგრძელებას აანონსებს
"ეს ჯერ კიდევ არ არის ყველაფერი, სპეცოპერაციები ისევ იქნება რუსეთის ტერიტორიაზე, მოსკოვში გაოცებულები დარჩებიან უკრაინელების შესაძლებლობებით" - ამის შესახებ უკრაინაში მებრძოლი "ქართული ლეგიონის" მეთაურმა მამუკა მამულაშვილმა მას შემდეგ განაცხადა, რაც ცნობილი გახდა, რომ უკრაინის თავდაცვის ძალებმა რუსეთის სარატოვისა და რიაზანის ოლქებში მდებარე ორ რუსულ აეროდრომზე და სხვა მნიშვნელოვან სამხედრო ობიექტებზე წარმატებული დარტყმა განახორციელეს.
შეგახსენებთ, რომ ამ ღონისძიება წინ უძღოდა უკრაინის უსაფრთხოების სამსახურის სპეციალური ოპერაცია, კოდური სახელწოდებით "ობობის ქსელი“, რომლის ფარგლებშიც უკრაინელებმა რუსებს სტრატეგიული ბომბდამშენები გაუნადგურეს. უკრაინის თავდაცვის ძალების წარმომადგენლები აცხადებენ, რომ უკრაინის უსაფრთხოების მდგომარეობის გასაუმჯობესებლად სამოქალაქო ინფრასტრუქტურასა და მოსახლეობაზე რუსეთის მხრიდან მუდმივი თავდასხმების ფონზე მსგავსი ოპერაციები შესაძლოა, განმეორდეს.
რა ინფორმაცია აქვს ამის შესახებ "ქართული ლეგიონის" მეთაურს, როგორი მომზადებული ხვდება უკრაინა პუტინის შურისძიებას, რა ვითარებაა უშუალოდ ფრონტის ხაზზე და როგორი განწყობებია მებრძოლებში, ამის შესახებ მამუკა მამულაშვილი გვიამბობს:
- უკრაინამ ომის წარმოების ინოვაციური მოდელი წარმოადგინა - მტრის ტერიტორიაზე განხორციელებული ოპერაციებით უკრაინელებმა გაანადგურეს რუსეთის სტრატეგიული ავიაცია და ქვეყნის სამხედრო პოტენციალს უდიდესი დარტყმა მიაყენეს. დაზიანებული ან განადგურებულია ძირითადი სტრატეგიული ბომბდამშენები, მათ შორის - Tu-95, Tu-22M3 და A-50 ტიპის თვითმფრინავები. რუსეთს აღარ აქვს ფუნქციური ქარხნები, რომლებიც ამ ტექნიკის სათადარიგო ნაწილებს აწარმოებს, რაც რეალურად გამორიცხავს მათი აღდგენის შესაძლებლობას უახლოეს პერიოდში. შედეგად, ქვეყანა ფაქტობრივად რჩება სტრატეგიული ავიაციის გარეშე. სხვათა შორის, ძალიან სიმბოლური ამბავია - უკრაინამ დღეს რუსეთს სწორედ ის იარაღი გაუნადგურა, რომელიც 30 წლის თავად გადასცა, ბუდაპეშტის მემორანდუმის ფარგლებში.
თქვენ იცით, რომ საბჭოთა კავშირის დაშლის შემდეგ, უკრაინა მსოფლიოში მესამე ყველაზე მსხვილი ბირთვული სახელმწიფო იყო. 200-ზე მეტი ინტერკონტინენტალური ბალისტიკური რაკეტა და 1700 ბირთვული ქობინი ჰქონდა, მაგრამ რუსეთს, ამერიკის შეერთებულმა შტატებსა და ინგლისს შორის გაფორმებული ხელშეკრულების თანახმად, უსაფრთხოების გარანტიების სანაცვლოდ დაუთმო. რუსეთმა როგორც წესი, ახლაც დაარღვია შეთანხმება, რომლის ძალითაც უკრაინის წინააღმდეგ ეკონომიკური და სამხედრო ძალის გამოყენება ეკრძალებოდა. რუსეთი მალე მოიმკის იმას, რისი ღირსიც არის. მოსკოვი უკვე ფაქტობრივად დარჩა შავი ზღვის ფლოტის გარეშე. შავი ზღვისპირეთის კონტროლი დღეს უკრაინის ხელშია. რუსებს ფლოტის მთლიანად გაყვანა მოუწიათ მიმდებარე ტერიტორიებიდან, ხოლო არსებული ერთეულები სხვადასხვა მიმართულებით ჰყავთ გადამალული. ეს ნიშნავს, რომ უკრაინა დომინანტია შავ ზღვაში.
- ოპერაცია "ობობას ქსელის" განხორციელების შემდეგ, სოციალურ ქსელში გავრცელდა ინფორმაცია მალე იქნებოდა "ობობას ქსელი-2" და მართლაც ჩვენ ისევ ვიხილეთ უკრაინელების შეტევა რიაზანსა და სარატოვში. შეგიძლიათ თქვათ, რომ ჩვენ ვიხილავთ "ობობას ქსელი-3"“?
- „ობობას ქსელი“ ერქმევა თუ სხვა რამ ვერ გეტყვით, მაგრამ კომბინირებული დარტყმები ნამდვილად იქნება რუსეთის სამხედრო პოტენციალზე. გარწმუნებთ, რუსები მალე გაოცებულები დარჩებიან უკრაინული არმიის შესაძლებლობებით. ეს ნამდვილად არ იყო ერთჯერადი ოპერაცია, ეს არის კარგად გათვლილი და დაგეგმილი ოპერაციების კასკადი, რომელიც აუცილებლად დამთავრდება რუსეთის დამარცხებით.
ვრცელდება სატელიტური ფოტოები, რომელიც "ობობის ქსელის" შედეგებს ასახავს
- თქვენ იცით, რომ ამ ოპერაციების გამო რუსებმა შურისძიება დააანონსეს, ცოტა ხნის გავრცელდა ინფორმაცია იმის შესახებ, რომ რუსები კიევში სამთავრობო კვარტლის დაბომბვას აპირებენ. რისთვის არის ახლა მზად უკრაინა?
- სამოქალაქო ინფრასტრუქტურის დაბომბვა და სამოქალაქო პირების მკვლელობა, არც შურისძიებაა და არც პასუხი უკრაინულ სპეცოპერაციაზე, ეს არის არის ტერორიზმი. მე არ ვიცი, ვინ რა სასწაულს ელოდება რუსეთისგან, მაგრამ უკრაინელებმა უკვე დაამტკიცეს, რომ ის სულაც არ არის ზესახელმწიფო. უკრაინელ ხალხს უკვე აღარაფრის აღარ ეშინია, იმიტომ, რომ რუსეთმა უკვე აბსოლუტურად ყველაფერი გააკეთა რისი გაკეთებაც შეეძლო. რაც შეეხება, ბირთვული იარაღის გამოყენებით მანიპულირებას, ამ მეთოდს პუტინი ომის დაწყების დღიდან მიმართავს, ამით შეიძლება შეაშინოს დასავლეთი, ისიც გარკვეული პოლიტიკოსები, რაღაც ნაწილმა უკვე გამოიმუშავა იმუნიტეტი და აღარ აღიქვამს სერიოზულად. ერთი საგულისხმო რამ მინდა გითხრათ, უკრაინული დრონებით რუსეთის დაბომბვის კადრებს ვუყურებდი და გავიგე, როგორ ეუბნებოდნენ რუსები ერთმანეთს, - ნუ გეშინიათ სამოქალაქოებს არაფერს ერჩიან, მხოლოდ სამხედრო ინფრასტრუქტურას ბომბავენო. ამ ომმა უკრაინელების და რუსების რეალური სახეები გამოაჩინა - უკრაინელები მოქმედებენ, როგორც პროფესიონალი სამხედროები, ანადგურებენ მხოლოდ სამხედრო დანიშნულების ობიექტებს, რუსები ჩვეულებრივი მკვლელები არიან, მოხუცებსა და ბავშვებსაც კი არ ინდობენ. რუსები აკეთებენ იმას, რასაც არასდროს არ გააკეთებს მსოფლიოს არც ერთი არმია. იხილეთ სრულად