"ბავშვია, ბიჭო! გამოუშვით! ჩემი მხარდაჭერა ყველას, ვინც ამ დღეებში უმოწყალოდ სცემეს, ამათ ვერავინ მოერევა" - დუტა სხირტლაძე მიმართვას ავრცელებს
მსახიობი და ტელეწამყვანი დუტა სხირტლაძე სოციალურ ქსელში ეხმაურება მიმდინარე მოვლენებს და ახალგაზრდებს, რომლებიც რუსთაველის გამზირზე აქციაზე დგანან, მხარდაჭერას უცხადებს.
ის აზიარებს არასრულწლოვანის ფოტოს, რომელიც აქციაზე დააპატიმრეს და წერს:
"ბავშვია, ბიჭო!!! ბავშვიიიიი!!! გამოუშვით!!! ჩემი მხარდაჭერა შენ, კარგო ბიჭო და ყველას ვინც ამ დღეებში უმოწყალოდ სცემეს (მათ შორის ჩემი უმცროსი კოლეგებიც).. პატარა გოგო-ბიჭებს... ჟურნალისტებს, ოპერატორებს... ქვეყანა ამათია. შვილებისაა... ვიღაცები "ბანდერლოგებს" უწოდებენ..
აი ამათ... ქვეყანაზე უზომოდ შეყვარებულ ახალ თაობას... თავისუფლებაში დაბადებულებს. მათი გონება რომ მოგცათ მაგინებლებს - ისე შეგრცხვებოდათ საკუთარი თავის. თუ არ გჯერათ - გაბედეთ და დაელაპარაკეთ. ნებისმიერს. თუმცა რაზე უნდა დაელაპარაკოთ... ბავშვები, შვილები, ახალი თაობა - ესაა ჩვენი საზრუნავი და ჩვენი მომავალი... ამათ ვერავინ მოერევა. ვერც ვერავინ მორევია. ვერასდროს" - წერს სხირტლაძე.
ასევე "მთავარი არხი" ავრცელებს ინფორმაციას, რომ დუტა სხირტლაძემ "იმედი" პროტესტის ნიშნად დატოვა.
ცნობისთვის, უკვე 10 დღეზე მეტია საქართველო მსოფლიო მედიის ობიექტივშია. თბილისი და რეგიონები საპროტესტო აქციებმა მოიცვა. მოქალაქეები შვიდი დღეა აპროტესტებენ 28 ნოემბერს მთავრობის მიერ მიღებულ გადაწყვეტილებას, რომ ევროკავშირთან მოლაპარაკების გახსნის საკითხი 2028 წლის ბოლომდე დღის წესრიგში არ დააყენოს.თითქმის ყოველ ღამე აქციების დაშლისას სპეცრაზმი იყენებს წყლის ჭავლს, ცრემლსადენ გაზს და სხვადასხვა საშუალებებს. შედეგად ჟურნალისტები და მოქალაქეები დაშავდნენ. მთავრობის გადაწყვეტილებას საჯარო უწყებებში თანამშრომლების პროტესტი მოჰყვა. ასევე გაიფიცნენ კულტურის სფეროს წარმომადგენლები.