საპატრულო პოლიციის დეპარტამენტის უფროსად თეიმურაზ კუპატაძეა წარდგენილი
საქართველოს შინაგან საქმეთა მინისტრმა გიორგი გახარიამ საპატრულო პოლიციის დეპარტამენტის უფროსად თეიმურაზ კუპატაძე წარადგინა.
როგორც გახარიამ აღნიშნა, საპატრულო პოლიცია შსს-ის უმნიშვნელოვანესი ქვედანაყოფია, რომელიც ყოველთვის იცავს მოსახლეობის უსაფრთხოებას.
"იმ საქმეში, რომელიც არის სამართლიანი, ყოველთვის ვიქნები თქვენს გვერდით",- მიმართა გახარიამ საპატრულო პოლიციის თანამშრომლებს.
თეიმურაზ კუპატაძემ თავის მხრივ აღნიშნა, რომ მზად არის დაიცვას თითოეული მოქალაქის უსაფრთხოება.
თეიმურაზ კუპატაძე 1979 წელს დაიბადა ჭიათურაში. იგი შინაგან საქმეთა სამინისტროს საპატრულო პოლიციის დეპარტამენტის მცხეთა-მთიანეთის მთავარი სამმართველოს უფროსის პოსტს იკავებდა. ამასთან, იგი რამდენიმე წლის წინ აჭარის საპატრულო პოლიციის უფროსი იყო. მას ჰყავს მეუღლე და ორი შვილი.