"პატრიოტთა ალიასნმა" რუსეთს საქართველო-ნატო-რუსეთის ფორმატის შექმნა შესთავაზა
"პატრიოტთა ალიანსი" მოსკოვში გამართულ ვიზიტს "სერიოზულ გარღვევად" აფასებს. მოსკოვში გამართული ვიზიტის შედეგებზე პარტიის წევრმა, დეპუტატმა ადა მარშანიამ "ტვ პირველთან" ისაუბრა.
"აბსოლუტურად დაგვთანხმდნენ, გაიზიარეს ჩვენი წუხილი და დააფიქსირეს ყველანაირი დახმარება იმისთვის, რომ შედგეს პირდაპირი დიალოგი აფხაზებთან და ოსებთან",- განაცხადა ადა მარშანიამ. მისივე თქმით, "პატრიოტთა ალიასნმა" რუსეთს საქართველო-ნატო-რუსეთის ფორმატის შექმნა შესთავაზა.
"მოდით, ვუთხრათ ერთმანეთს ღიად და გულწრფელად - ნატოსკენ სწრაფვა და ნატო-ს წევრობის სურვილი, ჩვენი ჩრდილოატლანტიკური პოლიტიკა უამრავ პრობლემას უქმნის ქვეყანას. ხომ უნდა დავინახოთ ობიექტური რეალობა, რომელიც ჩვენს ქვეყანაში სუფევს და მძიმდება ყოველდღე ოკუპირებულ ტერიტორიებზე.
ჩვენ შევთავაზეთ, მოდი დავმთავროთ ეს გაუგებარი თამაში, შევქმნათ ფორმატი - საქართველო-ნატო-რუსეთი და ვისაუბროთ ყველაფერზე.
მთავარი ჩვენი პოზიციაა - ჩვენ მიგვაჩნია, რომ ჩვენი ქვეყნის ტერიტორია არასოდეს უნდა იყოს იმ მოედნად ქცეული, საიდანაც რამენაირი საფრთხე დაემუქრება რომელიმე ქვეყანას, ჩვენს სამეზობლოს, ეს მხოლოდ რუსეთს არ ეხება",- აღნიშნა ადა მარშანიამ.