ირაკლი კობახიძე - პრეზიდენტს შეეშინდა, რადგან არც ერთი არგუმენტი რეალურად არ აქვს
შეხვედრის ზუსტად ის ფორმატი შევთავაზეთ პრეზიდენტს, რომელიც საზოგადოებას ნათელი წარმოდგენის შექმნის შესაძლებლობას მისცემდა, თუმცა, პრეზიდენტმა ამას თავი აარიდა, პრეზიდენტს შეეშინდა, რადგან არც ერთი არგუმენტი რეალურად არ აქვს, - ამის შესახებ საქართველოს პარლამენტის თავმჯდომარე ირაკლი კობახიძემ განაცხადა.
კობახიძის თქმით, პირდაპირ ეთერში საუბარი პრეზიდენტს იმის გამო შესთავაზეს, რომ საზოგადოება ახალ კონსტიტუციასთან დაკავშირებით სათანადო ინფორმაციას ვერ იღებს.
"საზოგადოება ვერ იღებს სათანადო ინფორმაციას იმ კონსტიტუციასთან დაკავშირებით, რომელიც უამრავი დეტალისგან შედგება. ზუსტად ის ფორმატი შევთავაზეთ ჩვენ პრეზიდენტს, რომელიც საზოგადოებას ნათელი წარმოდგენის შექმნის შესაძლებლობას მისცემდა, თუმცა, პრეზიდენტმა ამას თავი აარიდა. პრეზიდენტს შეეშინდა, რადგან არც ერთი არგუმენტი რეალურად არ აქვს", - განაცხადა ირაკლი კობახიძემ სამაუწყებლო კომპანია "რუსთავი2"-ის ეთერში სტუმრობისას.
საქართველოს პარლამენტის თავმჯდომარემ ირაკლი კობახიძემ, რამდენიმე დღის წინ პრეზიდენტს საკონსტიტუციო ცვლილებების პირდაპირ ეთერში განხილვა შესთავაზა. თავის მხრივ პრეზიდენტმა პარლამენტის თავმჯდომარეს კონსტიტუციის შესახებ სასაუბროდ პრეზიდენტის ადმინისტრაციაში მისვლა შესთავაზა.