როგორ გადანაწილდება "ნაციონალურ მოძრაობაში" პოსტები
პარლამენტში "ნაციონალური მოძრაობის" ფრაქციის თავმჯდომარე რომან გოცირიძე იქნება, - აღნიშნული ინფორმაცია "ინტერპრესნიუსს" თავად რომან გოცირიძემ დაუდასტურა.
როგორც გოცირიძემ აღნიშნა, დღეს პარლამენტში "ნაციონალური მოძრაობის" ფრაქციის სიას წარადგენენ, რათა ორშაბათის ბიუროს სხდომაზე მოხდეს მისი დამტკიცება.
პარლამენტში "ნაციონალური მოძრაობის" ფრაქცია 6 წევრისგან დაკომპლექტდება. ესენი არიან - რომან გოცირიძე, ნიკა მელია, თინათინ ბოკუჩავა, კობა ნაყოფია, სალომე სამადაშვილი და აზერ სულეიმანოვი.
ამასთან, ცნობილია, რომ "ნაციონალური მოძრაობის" პოლიტსაბჭოს ორი თანათავმჯდომარე - ნიკა მელია და ზაზა ბიბილაშვილი ეყოლება.
ხვალ დაგეგმილ ყრილობაზე პარტიის პოლიტსაბჭო დაკომპლექტდება, რომელიც აღნიშნულ პოსტებზე ნიკა მელიასა და ზაზა ბიბილაშვილს აირჩევს.
"ნაციონალური მოძრაობის" მეშვიდე ყრილობა ხვალ, 14:00 საათზე სპორტის სასახლეში გაიმართება. ყრილობის ძირითადი ნაწილი დაეთმობა პოლიტიკური ლიდერების გამოსვლას. ასევე მოხდება საორგანიზაციო კომისიის შეფასება, რომელსაც ცნობად მიიღებს ყრილობა. ყრილობაზე აირჩევენ პოლიტსაბჭოს ახალ შემადგენლობას და ასევე სხვა მმართველობით თანამდებობების პირებს.