ელენე ხოშტარია - "ნაციონალური მოძრაობა" დაკავდება ეკონომიკური პრობლემების გადაჭრით
"ერთიანი ნაციონალური მოძრაობა" დაკავდება ეკონომიკური პრობლემების გადაჭრით, ბიზნესის განვითარებით, კერძო საკუთრების დაცვით, - ამის შესახებ პარტიის საარჩევნო სიის მეორე ნომერმა ელენე ხოშტარიამ ჟურნალისტებთან საუბრისას განაცხადა.
მისი თქმით, დღეს ძალიან მნიშვნელოვანია, რომ ენერგია მიმართონ იმ პრობლემების გადაჭრაზე, რაც არის ქვეყანაში და არა შუღლზე, გახლეჩაზე, აგრესიაზე, რასაც "ბოლო წლებია აქვს ადგილი".
"ჩვენ დავკავდებით ძალიან ენერგიულად ეკონომიკური პრობლემების გადაჭრით, ბიზნესის განვითარებით, კერძო საკუთრების დაცვით, სასამართლოსა და ყველა უმნიშვნელოვანესი დემოკრატიული ინსტიტუტის უპირობო გარანტიების შექმნით, რაც იქნება გარანტია იმისა, რომ საქართველო გახდება ღირსეული, დემოკრატიული, ევროპული სახელმწიფო", - განაცხადა ელენე ხოშტარიამ.
"ერთიანმა ნაციონალურმა მოძრაობამ" გუშინ საარჩევნო სიის ნაწილი წარადგინა. საარჩევნო სია საზოგადოებას პარტიის ლიდერმა, დავით ბაქრაძემ გააცნო. სიის პირველი ათეული ასე გამოიყურება: 1. დავით ბაქრაძე; 2. ელენე ხოშტარია; 3. რომან გოცირიძე; 4. ნიკა მელია; 5. გიორგი ტუღუში; 6. ოთო კახიძე; 7. სალომე სამადაშვილი; 8. ირაკლი აბესაძე; 9. სერგი კაპანაძე; 10. სერგო რატიანი.
ასევე, პარტიის ახალი სახეები იქნებიან ლელა ქებურია, დიტო ძაგნიძე, სოფიო სიუკაევა, ნინო კვიტაიშვილი, მარიამ რამინაშვილი და ბესო წერედიანი.