ვერტმფრენმა დეტროიტის ქუჩებში ათასობით დოლარი გადმოყარა - ვრცელდება უჩვეულო სანახაობის ამსახველი ვიდეო
დეტროიტის მოსახლეობა უჩვეულო სანახაობის მომსწრე გახდა. მოულოდნელად მათ თავზე დოლარების წვიმა დაიწყო. როგორც ადგილობრივი მედია წერს, ათასობით დოლარი ვერტმფრენმა ჩამოყარა.
გაოცებული თვითმხილველები მომხდარის შესახებ ადგილობრივ მედიასთან, detroitnews -თან საუბრობენ. მათი თქმით, ფეხით მოსიარულეებმა ფული აიღეს და ეს ყველაფერი “საოცარი სანახავი იყო.“
„იმდენი ხალხი იყო, რომ ეს ნამდვილად სიგიჟე იყო“, - თქვა თვითმხილველმა.
მომხდარის გამო დროებით სავალი გზაც კი გადაკეტა. ფულის ასაღებად ხალხი მანქანებს აჩერებდა და საავტომობილო გზის შუაგულში ტოვებდა.
ადგილზე პოლიციაც გამოჩნდა, თუმცა ყველაფერმა ინციდენტების გარეშე ჩაიარა.
როგორც აღმოჩნდა, ეს ერთ-ერთი ავტოსამრეცხაოს მფლობელის უკანასკნელი სურვილი იყო. მამაკაცი ცოტა ხნის წინ ალცჰაიმერის დაავადებით გარდაიცვალა და მან ახლობლებს უკანასკნელი თხოვნა დაუტოვა.