ვრცელდება კადრები, როგორ აწყობენ "მოსადის" აგენტები ირანის სიღრმეში რაკეტებსა და ასაფეთქებელ დრონებს - სიზუსტით ჩატარებული ოპერაციის ვიდეო
ირანზე 200 საბრძოლო თვითმფრინავის გაშვებიდან რამდენიმე საათში, ისრაელის ოფიციალურმა პირებმა გამოაქვეყნეს ვიდეომასალა, რომელზეც, მათი თქმით, ჩანს, თუ როგორ აწყობენ „მოსადის“ აგენტები ირანის სიღრმეში რაკეტებსა და ასაფეთქებელ დრონებს. ეს რაკეტები თეირანთან ახლოს მდებარე სამიზნეებისკენაა მიმართული.
მოსადი ისრაელის სპეციალური დაზვერვის სააგენტოა. მისი დანიშნულებაა სადაზვერვო ინფორმაციის მოპოვება, ანტიტერორიზმი, ანტისახელმწიფოებრივი ზრახვებისა და უკანონო შეიარაღებული ქმედებების გამოძიება. ინსტიტუტი ისრაელის საიდუმლო სადაზვერვო სამსახურის კომპონენტია, დამოუკიდებელია სამხედრო დაზვერვისა და ეროვნული პოლიციისგან.მოსადი აშშ-ის დაზვერვის ცენტრალურ სააგენტოსთან (CIA), ბრიტანულ MI-6-თან, რუსეთის საგარეო დაზვერვის სამსახურთან (СВР) ერთად, მსოფლიოს საუკეთესო და ყველაზე ეფექტიანი სპეცსამსახურების სიაში შედის.
10 თვის წინ, მოსადმა ლიბანში „ჰეზბოლას“ ოპერატიული წევრების მიერ გამოყენებული ათასობით პეიჯერისა და რაციონის საბოტაჟი მოახერხა. თავდასხმას 37 ადამიანი ემსხვერპლა, დაახლოებით 3000 კი დაშავდა. შემდეგ ამ სამსახურმა წვლილი შეიტანა საჰაერო შეტევაში, რომელმაც რამდენიმე დღეში გაანადგურა ჰეზბოლას ლიდერები.
ათწლეულების განმავლობაში, "მოსადმა“ ირანში ინფორმატორების, აგენტებისა და ლოჯისტიკის ღრმა ქსელები შექმნა. გასულ წელს, „ჰამასის“ პოლიტიკური ლიდერი ისმაილ ჰანია თეირანში, სამთავრობო სასტუმროს ოთახში დამონტაჟებული ბომბით მოკლეს.